موٹروے سمیت اہم قومی شاہراہیں آج شام سے ٹریفک کیلئے مکمل بند رہیں گی

ترجمان موٹروے پولیس نے اہم سفری ہدایت نامہ جاری کرتے ہوئے اعلان کیا ہے کہ آج شام سے موٹرویز اور قومی شاہراہوں کو مختلف مقامات پر ہر قسم کی ٹریفک کے لیے مکمل طور پر بند رکھا جائے گا۔ ترجمان کے مطابق، موٹروے ایم ون (M-1) آج شام سے اسلام آباد ٹول پلازہ سے چھچھ انٹرچینج تک ٹریفک کے لیے بالکل بند رہے گی۔ اس کے علاوہ فتح جنگ، پنڈی گھیپ، تراپ، داؤد خیل، کوٹ بیلیاں اور عیسیٰ خیل انٹرچینج سے بھی کسی قسم کی گاڑی کو داخلے کی اجازت نہیں ہوگی، جس کے باعث شہریوں کو ایم ون پر سفر کرنے سے سخت گریز کی ہدایت کی گئی ہے۔

موٹروے پولیس کے ترجمان نے مزید بتایا کہ موٹروے ایم 14 (M-14) ہکلہ سے کنڈل تک دونوں اطراف سے مکمل طور پر بند رہے گی، جبکہ جی ٹی روڈ (N-5) کو بھی اٹک خورد کے مقام پر دونوں سمتوں میں ہر قسم کی آمدورفت کے لیے مسدود کر دیا گیا ہے۔ مزید برآں، ایم ٹو (M-2) موٹروے پر لاہور سے اسلام آباد کی جانب جانے والی بڑی اور بھاری گاڑیوں کے داخلے پر پابندی عائد کر دی گئی ہے۔ تمام بڑی گاڑیوں کو کالا شاہ کاکو اور دیگر مختلف مقامات سے جی ٹی روڈ پر متبادل راستوں کی طرف ڈائیورٹ کیا جائے گا۔