سابق بھارتی فوجی افسر کا پاکستان میں دہشتگردی کیلئے افغان سرزمین کے استعمال کا اعتراف

پاکستان میں بڑھتی ہوئی دہشت گردی اور امن و امان کی خراب صورتحال کے پیچھے ‘بھارت طالبان گٹھ جوڑ’ کے حوالے سے ایک اور بڑا اور چونکا دینے والا دعویٰ سامنے آ گیا ہے۔ سابق بھارتی فوجی افسر کرنل (ر) شیلندرہ سنگھ نے ایک ٹی وی پروگرام میں پاکستان مخالف بھارتی ریاستی پالیسی اور تخریبی سرگرمیوں کا کھلم کھلا اعتراف کیا ہے۔ انہوں نے کہا کہ بھارت اپنے شاطرانہ مقاصد کے حصول کے لیے افغان سرزمین اور طالبان کی حکومت کو پاکستان کے خلاف بطور ہتھیار استعمال کر رہا ہے۔

سابق بھارتی فوجی افسر نے انکشاف کیا کہ بھارت کی ہمیشہ سے یہ حکمت عملی رہی ہے کہ پاکستانی افواج کی تمام تر توجہ اور توانائیاں پاک افغان سرحد پر مرکوز رہیں۔ بھارت چاہتا ہے کہ پاک فوج مسلسل خیبر پختونخوا اور بلوچستان میں کالعدم تحریک طالبان پاکستان (TTP) اور دیگر دہشت گرد گروہوں کے ساتھ الجھی رہے۔ کرنل (ر) شیلندرہ سنگھ کے مطابق، نریندر مودی کی حکومت کی واضح پالیسی ہے کہ بلوچستان میں بی ایل اے (BLA) جیسے کالعدم اور پرتشدد گروہوں کی مالی و لاجسٹک حمایت کی جائے۔ دفاعی ماہرین کے مطابق سابق بھارتی فوجی کے ان اعترافات سے یہ بالکل واضح ہو گیا ہے کہ بھارت خطے میں بدامنی پھیلانے اور پاک فوج کو الجھانے کے لیے افغان سرزمین اور کالعدم تنظیموں کو اپنے مقاصد کے لیے استعمال کر رہا ہے۔