آپریشن شعبان 2، بلوچستان میں سکیورٹی فورسز کی کارروائیاں، 6 دہشتگرد ہلاک

بلوچستان میں امن و امان کے قیام اور دہشت گردی کے مکمل خاتمے کے لیے سیکیورٹی فورسز کی جانب سے ’آپریشن شعبان 2‘ کے تحت ملک دشمن عناصر کے خلاف کارروائیاں بلا تعطل جاری ہیں۔ سیکیورٹی ذرائع کے مطابق، سیکیورٹی فورسز نے خفیہ معلومات کی بنیاد پر بلوچستان کے علاقے ساران تنگی میں ’فتنہ الہندوستان‘ سے تعلق رکھنے والے دہشت گردوں کی موجودگی پر ایک بڑا اور کامیاب آپریشن کیا۔ اس کارروائی کے دوران شدید فائرنگ کے تبادلے کے بعد فتنہ الہندوستان کے 6 دہشت گرد ہلاک ہو گئے، جبکہ 9 مشتبہ افراد کو حراست میں لے لیا گیا۔

سیکیورٹی ذرائع نے بتایا کہ ہلاک ہونے والے دہشت گردوں کی تحویل سے بھاری مقدار میں جدید اسلحہ، بارودی مواد اور گولہ بارود برآمد کر کے قبضے میں لے لیا گیا ہے۔ ذرائع کا مزید کہنا ہے کہ علاقے کو تمام تر سیکیورٹی خطرات سے پاک کرنے کے لیے سیکیورٹی فورسز کا کلیئرنس آپریشن بدستور جاری ہے، اور ملک سے آخری دہشت گرد کے مکمل خاتمے تک یہ آپریشنز پوری طاقت کے ساتھ جاری رکھے جائیں گے۔