ایم ون اور ایم 14 سمیت اہم شاہراہیں کل شام سے بند کرنے کا اعلان

موٹروے پولیس کے ترجمان کے مطابق ایم ون موٹروے (M-1) کل شام سے اسلام آباد ٹول پلازہ سے چھچھ انٹرچینج تک دونوں اطراف سے ہر قسم کی ٹریفک کے لیے مکمل طور پر بند رہے گی۔ ترجمان نے بتایا کہ اس دوران فتح جنگ، ترنول، سنگجانی، براہمہ باہتر، برہان، ہزارہ موٹروے اور غازی انٹرچینجز بھی تمام تر گاڑیوں کی آمدورفت کے لیے بند رکھے جائیں گے۔

اسی طرح ایم 14 (M-14) موٹروے بھی کل شام سے ہکلہ تا کنڈل دونوں اطراف سے بند رہے گی، جس کے باعث فتح جنگ، پنڈی گھیپ، کھڑپہ، تراپ، داؤد خیل، کوٹ بیلیاں اور عیسیٰ خیل کے انٹرچینجز پر ٹریفک کی نقل و حرکت معطل رہے گی۔ علاوہ ازیں، جی ٹی روڈ (N-5) کو بھی اٹک خورد کے مقام پر دونوں اطراف سے ہر قسم کی ٹریفک کے لیے بند کر دیا جائے گا۔ موٹروے پولیس نے تمام شہریوں کو زحمت سے بچنے کے لیے سفر کی منصوبہ بندی سے قبل ٹریفک کی تازہ ترین صورتحال اور جاری کردہ ہدایات کو مدنظر رکھنے کی ہدایت کی ہے۔