ایران یمن میں حوثیوں کو اسلحہ فراہم کرنا بند کرے: جی 7 ممالک کا مشترکہ بیان

جی 7 ممالک (برطانیہ، کینیڈا، فرانس، جرمنی، اٹلی، جاپان اور امریکہ) کے وزرائے خارجہ نے ایک مشترکہ بیان جاری کرتے ہوئے ایران پر زور دیا ہے کہ وہ یمن میں حوثی باغیوں کو اسلحے کی فراہم اور ہر قسم کی امداد فوری طور پر بند کرے۔ نیویارک میں اقوام متحدہ کی جنرل اسمبلی کے اجلاس سے قبل سامنے آنے والے اس بیان میں جی 7 نے سعودی عرب پر حوثیوں کے حملوں کی شدید الفاظ میں مذمت کی اور تنبیہ کی کہ یمن میں سعودی حمایت یافتہ فورسز کے خلاف حوثیوں کی لڑائی میں حالیہ شدت نہ صرف خطے بلکہ عالمی توانائی کے تحفظ کے لیے بھی بڑا خطرہ ہے۔ وزرائے خارجہ نے حوثیوں سے تمام فوجی کارروائیاں اور تجارتی جہاز رانی پر حملے روک کر سیاسی حل کی طرف واپس آنے کا مطالبہ کیا ہے۔

یہ بیان ایک ایسے وقت میں آیا ہے جب حوثیوں نے عالمی تجارت کے اہم راستے آبنائے باب المندب اور بحیرہ احمر کے ساحلی علاقوں پر اپنا قبضہ بڑھا لیا ہے، جس کے باعث ہزاروں پناہ گزین علاقہ چھوڑنے پر مجبور ہو گئے ہیں اور اقوام متحدہ کے مطابق بے گھر افراد کی تعداد 1 لاکھ 20 ہزار سے تجاوز کر گئی ہے۔ دوسری جانب حوثی ذرائع کا کہنا ہے کہ یمن کے اہم ساحلی شہر مخا پر، جس پر حال ہی میں انہوں نے قبضہ کیا تھا، سعودی حملوں کے نتیجے میں دو بچوں اور ایک خاتون سمیت کم از کم 6 افراد ہلاک جبکہ 8 زخمی ہوئے ہیں۔ تاہم، یمن کی بین الاقوامی سطح پر تسلیم شدہ حکومت کی حمایت کرنے والے سعودی عرب نے ان مبینہ حملوں پر فی الحال کوئی تبصرہ نہیں کیا ہے۔