راولپنڈی: علیمہ خان کے خلاف 26 نومبر احتجاجی کیس کا ٹرائل مکمل، فیصلہ 25 ستمبر کو سنایا جائے گا

انسدادِ دہشت گردی عدالت (اے ٹی سی) راولپنڈی نے بانی پی ٹی آئی کی ہمشیرہ علیمہ خان کے خلاف 26 نومبر کے احتجاج پر درج مقدمے کا ٹرائل مکمل کر لیا ہے، جس کے بعد عدالت نے حتمی دلائل کی سماعت مکمل کر کے فیصلہ محفوظ کر لیا۔ اے ٹی سی راولپنڈی کے جج امجد علی شاہ مقدمے کا محفوظ شدہ فیصلہ بروز جمعہ 25 ستمبر کو سنائیں گے۔

سماعت کے دوران علیمہ خان کے وکیل فیصل ملک نے ان کی ایک روز کی حاضری سے استثنیٰ کی درخواست دائر کی، جسے عدالت نے منظور کر لیا۔ تاہم، حتمی دلائل کے مرحلے پر علیمہ خان کے وکیل پیش نہ ہوئے، جس پر عدالت نے کیس دو مرتبہ کال کیا مگر ان کی جانب سے کوئی نمائندگی سامنے نہ آئی۔ دوسری جانب، مقدمے میں نامزد دیگر ملزمان کے وکلاء چودھری امین، راحیلہ بٹ اور حق نواز منہاس عدالت میں پیش ہوئے اور انہوں نے اپنے دلائل مکمل کیے۔ تمام تر کارروائی کے بعد عدالت نے مقدمے کا فیصلہ محفوظ کرتے ہوئے سماعت جمعہ تک ملتوی کر دی۔