پاکستان اور سعودیہ میں سرکاری و سفارتی پاسپورٹ پر ویزا شرائط ختم

پاکستان اور سعودی عرب کے درمیان سفارتی اور سرکاری (ڈپلومیٹک و آفیشل) پاسپورٹ ہولڈرز کے لیے ویزا کی شرائط ختم کرنے کا ایک تاریخی معاہدہ طے پا گیا ہے۔ اس اہم معاہدے پر نیویارک میں اقوامِ متحدہ کے جنرل اسمبلی اجلاس کے موقع پر پاکستان کے نائب وزیراعظم و وزیر خارجہ سناتور اسحاق ڈار اور سعودی وزیر خارجہ شہزادہ فیصل بن فرحان نے باقاعدہ دستخط کیے۔ اس پیش رفت کو دونوں برادر ممالک کے درمیان دوطرفہ تعلقات کی مضبوطی اور سفارتی تعاون میں اضافے کا اہم سنگِ میل قرار دیا جا رہا ہے۔

معاہدے کی تقریب کے بعد گفتگو کرتے ہوئے نائب وزیراعظم اسحاق ڈار نے کہا کہ اس معاہدے کے نتیجے میں دونوں برادر اسلامی ممالک کے درمیان باہمی مفاد اور حکمتِ عملی پر مبنی شراکت داری مزید مضبوط ہوگی۔ انہوں نے وضاحت کی کہ اس فیصلے کا بنیادی مقصد اعلیٰ سطحی سفارتی روابط، سرکاری وفود کی آمدورفت اور ادارہ جاتی تبادلوں کو مزید سہولت اور رفتار فراہم کرنا ہے۔ نائب وزیراعظم نے مزید کہا کہ ویزا استثنیٰ کے اس اقدام سے دوطرفہ سرکاری و سفارتی سطح پر رابطے انتہائی آسان اور موثر ہو جائیں گے۔