اسلام آباد کو سومنات بنانے کی سازش قوم مسترد کر دے گی: احسن اقبال

وفاقی وزیر برائے منصوبہ بندی و ترقی احسن اقبال نے پاکستان تحریک انصاف (پی ٹی آئی) کی سیاسی حکمتِ عملی اور احتجاجی تحریک پر شدید تنقید کرتے ہوئے کہا ہے کہ قوم اسلام آباد کو ‘سومنات’ بنانے کی ہر سازش کو مسترد کر دے گی۔ اپنے ایک بیان میں انہوں نے کہا کہ پی ٹی آئی کے انتشاری ٹولے کی یہ منفی سیاست خود ان کے لیے ہی سومنات ثابت ہوگی۔ احسن اقبال نے وزیراعلیٰ خیبرپختونخوا سہیل آفریدی کو مشورہ دیا کہ وہ اسلام آباد پر چڑھائی کے بجائے اپنے صوبے میں دہشت گردی کے بڑھتے ہوئے واقعات اور امن و امان کی صورتحال بہتر بنانے پر توجہ مرکوز کریں۔

وفاقی وزیر نے مزید کہا کہ پی ٹی آئی کے بانی کے خلاف درج مقدمات کا سیاست سے کوئی تعلق نہیں بلکہ یہ کرپشن اور مالی بے ضابطگیوں کے خالص کیسز ہیں۔ انہوں نے تاکید کی کہ پی ٹی آئی کے ارکان اور کارکنان کو دورِ اقتدار میں ہونے والی اس کرپشن کے بارے میں اپنے بانی سے سوالات کرنے چاہئیں۔