وزیراعظم کا امیر جماعت اسلامی سے رابطہ، مارچ ملتوی کرنے کی درخواست

وزیراعظم محمد شہباز شریف نے امیر جماعت اسلامی حافظ نعیم الرحمان سے ٹیلی فون پر رابطہ کر کے پٹرولیم لیوی کے خلاف جاری جماعت اسلامی کے مارچ کو کچھ دنوں کے لیے ملتوی کرنے کی درخواست کی ہے۔ وزیراعظم نے کہا کہ حکومت پٹرولیم لیوی کے معاملے پر جماعت اسلامی سے نتیجہ خیز گفتگو کے لیے مکمل تیار ہے اور وہ اپنے غیر ملکی دورے سے وطن واپسی کے فوراً بعد امیر جماعت اسلامی سے ملاقات کریں گے تاکہ عوام کے لیے ایک بہتر اور جامع ریلیف پیکج کا اعلان کیا جا سکے۔

جواب میں امیر جماعت اسلامی حافظ نعیم الرحمان نے واضح کیا کہ ان کی جماعت عوام کے حقوق کی جدوجہد جاری رکھے گی اور جب تک پٹرولیم لیوی کا مکمل خاتمہ نہیں ہو جاتا، احتجاج ختم نہیں کیا جائے گا۔ تاہم انہوں نے کہا کہ مارچ میں چند دنوں کے وقفے سے متعلق وہ اپنی جماعت کی شوریٰ سے مشاورت کریں گے۔ اس سے قبل جماعت اسلامی کا ٹرین مارچ ملتان پہنچا جہاں ایک بڑے عوامی جلسے سے خطاب کرتے ہوئے حافظ نعیم الرحمان نے اعادہ کیا کہ پٹرول پر بھتہ ٹیکس سے عوام کو فوری نجات دلائی جائے، پٹرول پر لیوی کو جگا ٹیکس کے طور پر کسی صورت قبول نہیں کیا جائے گا۔