محسن نقوی کی ایرانی صدر سے ملاقات، مشترکہ تعاون کو مزید وسعت دینے کا عزم

وفاقی وزیرِ داخلہ محسن نقوی کے سرکاری دورۂ ایران کے دوران تہران میں ایرانی صدر مسعود پزشکیان سے اہم ملاقات ہوئی، جس میں دونوں رہنماؤں نے خطے کی تازہ ترین سیکورٹی و سیاسی صورتحال اور دوطرفہ تعلقات کے فروغ پر تفصیلی تبادلۂ خیال کیا۔ اس موقع پر صدر مسعود پزشکیان نے گفتگو کرتے ہوئے کہا کہ امریکی دباؤ کی وجہ سے مسلم ممالک ایک دوسرے کے مزید قریب آئے ہیں، اور ایران و پاکستان اپنی علاقائی صلاحیتوں کا استعمال کر کے ایک دوسرے کی معاشی و تجارتی ضروریات پورا کر سکتے ہیں۔ ایرانی صدر نے اس عزم کا اعادہ بھی کیا کہ پاکستان تجارت، معیشت، سیاست، ثقافت اور سائنس کے شعبوں میں مشترکہ تعاون کو وسعت دینے کے لیے پرعزم ہے۔

اس سے قبل وفاقی وزیرِ داخلہ محسن نقوی کی ایرانی وزارتِ داخلہ آمد پر ایرانی ہم منصب سکندر مومنی نے ان کا پرجوش استقبال کیا۔ دونوں وزرائے داخلہ کے درمیان ملاقات میں دوطرفہ سیکیورٹی تعاون اور جاری منصوبوں پر پیشرفت کا جائزہ لیا گیا۔ ایرانی وزیرِ داخلہ نے علاقائی امن و استحکام کے لیے پاکستان کے وزیراعظم اور فیلڈ مارشل کی کاوشوں اور مسلسل سفارتی کوششوں کا شکریہ ادا کرتے ہوئے اپنے حالیہ دورۂ پاکستان کو نہایت مفید قرار دیا۔ وزیرِ داخلہ محسن نقوی نے بھی یقین دہانی کرائی کہ آنے والے وقت میں اسلام آباد اور تہران کے تعلقات مزید مستحکم ہوں گے۔