وزیراعظم شہباز شریف کا نیویارک پہنچتے ہی حافظ نعیم الرحمان سے رابطہ؛ لانگ مارچ ملتوی کرنے کی درخواست،

وزیراعظم پاکستان میاں محمد شہباز شریف نے اقوامِ متحدہ کی جنرل اسمبلی کے اجلاس میں شرکت کے لیے نیویارک پہنچتے ہی امیر جماعت اسلامی پاکستان حافظ نعیم الرحمان سے ٹیلی فون پر رابطہ کیا ہے۔ نیویارک اور ملتان کے درمیان پیر اور منگل کی درمیانی شب ہونے والی اس اہم گفتگو کے دوران وزیراعظم نے جماعت اسلامی کے امیر سے جاری مارچ اور احتجاجی تحریک کو کچھ دنوں کے لیے ملتوی کرنے کی باضابطہ درخواست کی۔

گفتگو کے دوران وزیراعظم شہباز شریف نے بتایا کہ حکومت نے عوام کے لیے خصوصی ریلیف پیکج کا اعلان کر دیا ہے، جبکہ وہ وطن واپسی کے فوراً بعد حافظ نعیم الرحمان سے بالمشافہ ملاقات کریں گے اور عوام کے لیے مزید بہتر اور جامع ریلیف پیکج کا اعلان کریں گے۔ تاہم، امیر جماعت اسلامی حافظ نعیم الرحمان نے موجودہ اعلان شدہ حکومتی ریلیف پیکج کو مکمل طور پر مسترد کرتے ہوئے واضح کیا کہ جماعت اسلامی گزشتہ ڈیڑھ ماہ سے پٹرولیم لیوی کے خلاف احتجاج کر رہی ہے اور جب تک اس کا خاتمہ نہیں ہوتا، تب تک احتجاج سے کسی صورت دستبردار نہیں ہوا جائے گا۔

امیر جماعت اسلامی نے وزیراعظم کو بتایا کہ وہ مارچ میں چند روز کے وقفے یا التواء کے حوالے سے ان کی درخواست پر جماعت اسلامی کی مرکزی قیادت سے مشاورت کریں گے۔ حافظ نعیم الرحمان نے مزید کہا کہ منگل کی صبح ملتان میں پارٹی کی اعلیٰ قیادت کے ساتھ تفصیلی مشاورت کے بعد ہی آئندہ کا حتمی لائحہ عمل اور فیصلہ میڈیا کے سامنے پیش کیا جائے گا۔