را، طالبان انٹیلی جنس اور دہشتگرد گروہوں کے مبینہ گٹھ جوڑ کا انکشاف

بھارت کی خفیہ ایجنسی ’را‘ (RAW)، افغان طالبان کے انٹیلی جنس ادارے ‘جنرل ڈائریکٹوریٹ آف انٹیلی جنس’ (GDI) اور مختلف عسکریت پسند گروہوں کے مبینہ گٹھ جوڑ سے متعلق ایک حساس خفیہ انٹیلی جنس رپورٹ منظرِ عام پر آئی ہے۔ رپورٹ کے مطابق 2025ء میں قائم ہونے والے اس نیٹ ورک کا مقصد پاکستان کے اندر دہشت گردانہ کارروائیوں کے لیے مالی، افرادی اور لاجسٹک معاونت فراہم کرنا تھا۔ دستاویز میں انکشاف کیا گیا ہے کہ طالبان انٹیلی جنس نے سپریم لیڈر ملا ہیبت اللہ اخوندزادہ کی ہدایات پر فتنہ الہندوستان، فتنہ الخوارج (ٹی ٹی پی) اور دیگر گروہوں کے درمیان روابط قائم کیے، جس سلسلے میں جولائی 2026ء میں جی ڈی آئی کی میزبانی میں تین اہم اجلاس منعقد ہوئے۔

رپورٹ کے مطابق افغانستان سے باہر ہونے والی ایک ملاقات میں ‘را’ اور جی ڈی آئی کے درمیان بلوچستان میں بی ایل اے (BLA) اور ٹی ٹی پی کی مشترکہ کارروائیوں کی منصوبہ بندی کے لیے 78 لاکھ ڈالر سے زائد کی مبینہ مالی معاونت طے پائی۔ مزید برآں، پاکستانی فورسز کے بڑھتے ہوئے دباؤ کے بعد 26 اگست 2026ء کو قندھار میں ایک ہنگامی اجلاس ہوا جس میں بی ایل اے کی افرادی قوت کی کمی کو پورا کرنے کے لیے ٹی ٹی پی اور القاعدہ سے جنگجو اور اسلحہ فراہم کرنے کی یقین دہانی کرائی گئی۔ دستاویزات میں یہ بھی دعویٰ کیا گیا ہے کہ عالمی پابندیوں سے بچنے کے لیے بعض حملے ٹی ٹی پی کرتی ہے جبکہ ذمہ داری بی ایل اے قبول کرتی ہے، جیسا کہ 4 ستمبر کے زیارت حملے میں دیکھا گیا۔ دفاعی ماہرین کے مطابق افغان سرزمین پر ان گروہوں کا گٹھ جوڑ علاقائی امن کے لیے شدید خطرہ ہے۔