حکومت کے ساتھ مذاکرات کے لیے تیار ہیں، وزیراعظم سیاسی کمیٹی بنائیں: سینیٹ اپوزیشن لیڈر علامہ ناصر عباس

سینیٹ میں قائدِ حزبِ اختلاف اور مجلس وحدت مسلمین (MWM) کے سربراہ علامہ ناصر عباس نے ملک میں بڑھتی ہوئی سیاسی کشیدگی کے خاتمے کے لیے حکومت کو باضابطہ طور پر مذاکرات کی پیشکش کر دی ہے۔ اپنے ایک اہم بیان میں انہوں نے کہا کہ ہم سیاسی مسائل کے حل کے لیے گفتگو پر یقین رکھتے ہیں اور ہماری جانب سے حکومت کے ساتھ مذاکرات کے دروازے کھلے ہیں۔

علامہ ناصر عباس نے تجویز دی کہ وزیراعظم سیاسی رہنماؤں کی ایک کمیٹی تشکیل دیں اور دونوں جانب سے حکومتی و اپوزیشن کی مذاکراتی ٹیمیں قائم کی جائیں۔ انہوں نے اس بات پر زور دیا کہ انفرادی سطح پر بات چیت کے بجائے جب دونوں طرف سے سیاسی کمیٹیاں آپس میں بیٹھیں گی تو ملک کے پیچیدہ مسائل کا حل نکل آئے گا۔ سینیٹ اپوزیشن لیڈر کا مزید کہنا تھا کہ حکومت آج یا جب بھی بیٹھنا چاہے، وہ جمہوریت اور سیاسی استحکام کی خاطر مذاکرات کے لیے مکمل طور پر تیار ہیں۔