احتجاج ہمارا حق،27 ستمبر کو پوری قوت کے ساتھ نکلیں گے: سہیل آفریدی

وزیراعلیٰ خیبر پختونخوا سہیل آفریدی نے پشاور میں پریس کانفرنس کرتے ہوئے اعلان کیا ہے کہ پرامن احتجاج پاکستان تحریک انصاف (پی ٹی آئی) کا آئینی و قانونی حق ہے اور پارٹی 27 ستمبر کو پوری قوت کے ساتھ سڑکوں پر نکلے گی۔ انہوں نے کہا کہ تحریک انصاف کے ساتھ ‘سوتیلی ماں’ جیسا سلوک کیا جا رہا ہے، تاہم کسی خوف کے بغیر لانگ مارچ ہر صورت ہوگا اور اتنی بڑی تعداد میں لوگ باہر آئیں گے جس کا مخالفین تصور بھی نہیں کر سکتے۔ ان کے مطابق احتجاج کا حتمی پلان 25 ستمبر کو منظرِ عام پر لایا جائے گا۔

سہیل آفریدی نے واضح کیا کہ ان کا تصادم کا کوئی ارادہ نہیں اور وہ پرامن و جمہوری طریقے سے انصاف کے لیے آواز اٹھا رہے ہیں، تاہم انہوں نے خبردار کیا کہ اگر مظاہرین پر گولی چلائی گئی تو پھر دوسری طرف سے بھی گولی چلے گی۔ انہوں نے وزیرِ داخلہ کی حالیہ پریس کانفرنس کی شدید مذمت کرتے ہوئے کہا کہ وہ کوئی دہشت گرد نہیں ہیں اور نہ ہی بندوق کا مقابلہ بندوق سے کر رہے ہیں۔ وزیراعلیٰ نے مزید کہا کہ موجودہ کشیدہ صورتِ حال ملک کو خانہ جنگی کی طرف دھکیلنے کی کوشش ہے، لیکن تحریک انصاف پرامن سیاسی جدوجہد جاری رکھے گی۔