ایم کیو ایم کی اتوار والی ریلی ریفرنڈم تھا، دھمکیوں سے نہیں ڈرتے : خالد مقبول صدیقی

متحدہ قومی موومنٹ (ایم کیو ایم) پاکستان کے چیئرمین ڈاکٹر خالد مقبول صدیقی نے کراچی میں ایک اہم پریس کانفرنس سے خطاب کرتے ہوئے دعویٰ کیا ہے کہ شاہراہِ پاکستان پر ایم کیو ایم کی حالیہ ریلی عوامی ریفرنڈم ثابت ہوئی ہے، جس میں کراچی کے عوام نے تمام تر سازشوں اور رکاوٹوں کے باوجود سڑکوں پر نکل کر تاریخ رقم کر دی۔ انہوں نے کہا کہ 22 اگست کے بعد سے پارٹی کے لیے قدم قدم پر مشکلات کھڑی کی گئیں، لیکن اس کامیاب مارچ نے مخالفین کے تمام منصوبوں کو خاک میں ملا دیا ہے۔

خالد مقبول صدیقی نے کہا کہ کراچی سندھ کی کل آبادی کا تقریباً 57 فیصد ہے اور اب وقت آ گیا ہے کہ جاگیردارانہ نظام اور خاندانی حکومتوں کے خاتمے کے لیے ملک میں زیادہ سے زیادہ نئے انتظامی یونٹس اور صوبے قائم کیے جائیں۔ انہوں نے سندھ کے 18 سالہ طرزِ حکمرانی پر سخت تنقید کرتے ہوئے عدالتِ عظمیٰ سے نوٹس لینے اور جوڈیشل کمیشن تشکیل دینے کا مطالبہ کیا۔ ایم کیو ایم چیئرمین نے اعلان کیا کہ کامیاب ریلی پر ایک ایک یو سی (یونین کونسل) میں جا کر نمازِ شکرانہ ادا کی جائے گی اور انتظامی یونٹس کے قیام و اختیارات کی نچلی سطح تک منتقلی کے لیے جدوجہد جاری رہے گی۔