اسلام آباد پر دھاوا بولنے والوں کو سخت نتائج کا سامنا کرنا پڑے گا: محسن نقوی

وفاقی وزیرِ داخلہ محسن نقوی نے پاکستان تحریکِ انصاف (پی ٹی آئی) کو سخت الفاظ میں خبردار کرتے ہوئے کہا ہے کہ وہ وفاقی دارالحکومت اسلام آباد پر دھاوا بولنے کی تیاریاں ترک کر دے اور کسی ایسی بند گلی میں نہ جائے جہاں سے واپسی ممکن نہ ہو۔ لاہور میں پریس کانفرنس کرتے ہوئے وزیرِ داخلہ نے واضح کیا کہ پی ٹی آئی کی قیادت کے پاس اب بھی سنبھلنے کا وقت ہے، تاہم اگر اس بار اسلام آباد کی طرف پیش قدمی کی کوشش کی گئی تو مظاہرین کو انتہائی سخت نتائج کا سامنا کرنا پڑے گا۔

محسن نقوی نے کہا کہ پی ٹی آئی کی زیادہ تر قیادت خود اس لانگ مارچ کے حق میں نہیں ہے اور اس قسم کے ڈراموں یا ‘سومنات’ جیسی بڑھکوں سے کچھ حاصل نہیں ہونے والا۔ انہوں نے واضح کیا کہ اس بار ملک کو ۱۰ سے ۲۰ دن کے لیے بلاک کرنے یا یرغمال بنانے کی اجازت ہرگز نہیں دی جائے گی اور اگر پی ٹی آئی نے دھرنے کا راستہ اختیار کیا تو اسلام آباد ہائیکورٹ کے احکامات کے مطابق مکمل اور مستقل لائحہ عمل نافذ کیا جائے گا۔ بانی پی ٹی آئی کے طبی معائنے کے حوالے سے بات کرتے ہوئے وزیرِ داخلہ نے بتایا کہ گزشتہ رات بھی بانی کا طبی معائنہ کیا گیا تھا اور قانون کے مطابق تمام طبی سہولیات فراہم کی جا رہی ہیں، لیکن انتظامی امور اپوزیشن کی شرطوں پر طے نہیں ہوں گے۔

پریس کانفرنس کے دوران وزیرِ داخلہ نے ضلع ہنگو میں شہید ہونے والے سیکیورٹی اہلکاروں کے جنازوں میں خیبر پختونخوا کے وزیراعلیٰ اور کابینہ ارکان کی عدم شرکت پر شدید دکھ کا اظہار کیا۔ انہوں نے کہا کہ سیاسی اختلافات اپنی جگہ، لیکن شہداء کے جنازوں سے ایسی بے حسی کی مثال نہیں ملتی۔ ایک سوال کے جواب میں محسن نقوی کا کہنا تھا کہ ملک میں پٹرولیم مصنوعات کی قیمتوں کا تعیّن عالمی مارکیٹ سے منسلک ہے، جبکہ عوام نئے صوبوں کے قیام کی بھرپور حمایت کر رہے ہیں اور اگر اللہ نے چاہا تو ملک میں نئے صوبے ضرور قائم کیے جائیں گے۔