علیمہ کے بعد نورین نیازی اور عظمیٰ خان بھی 30 روز کیلئے نظر بند

بانی پاکستان تحریک انصاف (پی ٹی آئی) عمران خان کی ہمشیرہ علیمہ خان کے بعد ان کی دیگر دو بہنوں عظمیٰ خان اور نورین نیازی کو بھی انتظامیہ کی جانب سے نظر بند کر دیا گیا ہے۔ ڈپٹی کمشنر لاہور کے احکامات پر پولیس کی سفارش کے بعد دونوں بہنوں کو تھری ایم پی او (3 MPO) کے تحت 30 روز کے لیے نظر بند کیا گیا ہے۔ ذرائع کے مطابق پولیس نے رات گئے علیمہ خان کی رہائش گاہ پر کارروائی کرتے ہوئے ان کی بہنوں اور بھانجوں کو حراست میں لیا، جہاں بعد ازاں بچوں اور دیگر اہل خانہ کو رہا کر کے دونوں بہنوں کو نقصِ امن کے خدشے کے تحت جیل منتقل کر دیا گیا۔

اس سے قبل پولیس نے علیمہ خان کو لاہور کے اپر مال سے جم خانہ جاتے ہوئے حراست میں لیا تھا، جس کے بعد لٹن روڈ پولیس نے تھری ایم پی او کے تحت اقدام کرتے ہوئے انہیں کوٹ لکھپت جیل منتقل کر دیا تھا۔ انتظامیہ کا کہنا ہے کہ شہر میں امن و امان کی صورتحال کو برقرار رکھنے کے لیے پولیس کی سفارشات پر یہ کارروائیاں عمل میں لائی گئی ہیں۔