امریکا نے ایران کے ساتھ کسی معاہدے تک پہنچنے کی یقین دہانی کرائی ہے: قطر

قطر کی وزارتِ خارجہ نے انکشاف کیا ہے کہ امریکہ اور ایران کے درمیان تعطل کا شکار مذاکرات کو دوبارہ شروع کرانے کے لیے گزشتہ تقریباً دو ہفتوں سے انتہائی اہم سفارتی رابطے اور مختلف تجاویز پر بات چیت جاری ہے، جبکہ اس اہم سفارتی عمل اور ثالثی کی کوششوں میں پاکستان بھی متحرک طور پر شریک ہے۔ قطری وزارتِ خارجہ کے ترجمان ماجد الانصاری کے مطابق قطر کی ثالثی ٹیم تہران اور واشنگٹن دونوں کے ساتھ مسلسل رابطے میں ہے اور مذاکرات کی بحالی کے عملی امکانات کا بغور جائزہ لے رہی ہے۔

ترجمان ماجد الانصاری نے بتایا کہ ثالثی میں شامل سفارت کار مختلف دارالحکومتوں کے دورے کر رہے ہیں تاکہ اس معاملے میں مثبت پیش رفت ممکن بنائی جا سکے۔ انہوں نے بتایا کہ قطر کو امریکی انتظامیہ کی جانب سے واضح یقین دہانیاں موصول ہوئی ہیں کہ واشنگٹن خطے میں تناؤ کم کرنے اور کسی پائیدار معاہدے تک پہنچنے میں سنجیدہ ہے۔ قطری ترجمان نے زور دے کر کہا کہ علاقائی استحکام کے لیے ایسا بین الاقوامی اتفاقِ رائے ضروری ہے جو آبنائے ہرمز سمیت تمام عالمی آبی گزرگاہوں کی سیکیورٹی اور بلا تعطل آمدورفت کو یقینی بنائے۔ انہوں نے خبردار کیا کہ کسی بھی ایک ریاست کی جانب سے عالمی آبی گزرگاہ پر بالادستی قائم کر کے اسے بطور ہتھیار استعمال کرنا تمام ممالک کے لیے انتہائی خطرناک پیشِ خیمہ ثابت ہو سکتا ہے۔