کیف پر روسی ڈرون حملوں میں 3 بچوں سمیت 4 افراد ہلاک

یوکرین کے دارالحکومت کیف اور اس کے گرد و نواح میں روسی ڈرون حملوں کے نتیجے میں چار افراد ہلاک ہو گئے، جن میں تین بچے بھی شامل ہیں۔ کیف کے علاقائی حکام کے مطابق ڈرون حملے رات بھر جاری رہے جبکہ دن کے وقت بھی دارالحکومت اور ملحقہ علاقوں میں ڈرون حملوں کا سلسلہ نہ تھم سکا۔ یوکرین کی ایمرجنسی سروس کے مطابق کیف کے علاقے میں ایک روسی ڈرون نے رہائشی مکان کو نشانہ بنایا، جس کے نتیجے میں ایک ماں اور اس کے 3 سالہ جڑواں بچے موقع پر ہی جان کی بازی ہار گئے۔

علاقائی گورنر نے بتایا کہ ایک اور علاقے میں ڈرون حملے سے شدید زخمی ہونے والی بچی نے اسپتال میں دم توڑ دیا، جبکہ کیف کے میئر نے دارالحکومت میں دیگر افراد کے زخمی ہونے اور املاک کو نقصان پہنچنے کی تصدیق کی۔ ڈرونز کا ملبہ شہر کے مختلف علاقوں میں گرا، جہاں جنوب مغربی علاقے فاسٹیو (Fastiv) میں 24 سے زائد سائٹس بشمول رہائشی مکانات، صنعتی عمارتیں اور گاڑیاں تباہ ہوئیں۔ اس کے علاوہ شمالی شہر سومی (Sumy) میں رہائشی عمارت کے قریب روسی حملے میں ایک شخص ہلاک اور دوسرا زخمی ہو گیا۔