سول سروس میں اصلاحات کیلئے سمارٹ ریفارمز پیکیج تیار، اہم ترامیم کی تجویز

وفاقی سول سروس میں وسیع پیمانے پر بنیادی اصلاحات اور نظام کو جدید تقاضوں سے ہم آہنگ کرنے کے لیے وزیراعظم کی قائم کردہ کمیٹی نے ‘سمارٹ ریفارمز پیکیج’ تیار کر لیا ہے۔ وفاقی وزیر احسن اقبال کی سربراہی میں قائم اس کمیٹی نے بھارت سمیت ۲۵ ممالک کے سول سروس نظاموں کا باریک بینی سے جائزہ لینے کے بعد حتمی سفارشات مرتب کی ہیں۔ اس اصلاحاتی پیکیج کے تحت ‘سول سرونٹس ایکٹ ۱۹۷۳’ اور ‘رولز آف بزنس ۱۹۷۳’ میں مجموعی طور پر ۲۲ ترامیم کے ساتھ ساتھ ۳ نئے قوانین متعارف کرانے کی سفارش کی گئی ہے، جبکہ ان تبدیلیوں کے لیے آئین میں کسی قسم کی ترمیم کی ضرورت نہیں ہو گی۔

مجوزہ اصلاحات کے تحت سی ایس ایس (CSS) امتحانی نظام میں اہم تبدیلیاں تجویز کی گئی ہیں، جن میں ابتدائی ٹیسٹ (MTP) کی پاسنگ کی حد ۳۳ فیصد سے بڑھا کر ۴۰ فیصد کرنا، منفی مارکنگ کا خاتمہ اور امیدواروں کی تجزیاتی صلاحیت جانچنے کا نیا طریقہ شامل ہے۔ علاوہ ازیں، انگریزی اور اردو کی شرط برقرار رکھتے ہوئے مضمون، پریسی و کمپوزیشن، اسلامیات، مطالعہ پاکستان اور کرنٹ افیئرز کے پرچے اردو میں دینے کی تجویز دی گئی ہے۔ ایک روزہ روایتی انٹرویو کی جگہ آئی ایس ایس بی (ISSB) طرز پر جامع جائزہ لیا جائے گا اور بھرتی کا تمام عمل ۶ ماہ کے اندر مکمل کیا جائے گا۔ نیز کامیاب امیدواروں کی تعیناتی ان کی تعلیمی ڈگری سے متعلقہ آسامیوں پر کی جائے گی۔

اصلاحاتی پیکیج میں افسران کی ترقی اور مراعات کو سنیارٹی کے بجائے کارکردگی سے مشروط کرنے، اسٹیبلشمنٹ ڈویژن کا نام تبدیل کر کے ‘ہیومن ریسورس آرگنائزیشن ڈیویلپمنٹ ڈویژن’ رکھنے اور ۱۱ نئے پیشہ ورانہ گروپس تشکیل دینے کی سفارش کی گئی ہے۔ گریڈ ۲۰ اور اس سے اوپر کے افسران کے لیے ‘نیشنل ایگزیکٹو سروس’ اور تمام تربیتی اداروں کو ضم کر کے ‘نیشنل یونیورسٹی آف پبلک ایڈمنسٹریشن’ قائم کی جائے گی۔ مالیاتی مراعات کے تحت ملازمین کی تنخواہوں میں سالانہ مہنگائی کے حساب سے خودکار اضافہ، پرفارمنس کی بنیاد پر ۵ فیصد اضافی فنڈز، گاڑیوں کے لیے آسان قرضے اور ریٹائرمنٹ پر ۵۰ لاکھ روپے کی یکمشت رقم شامل ہے۔ اصلاحات کی حتمی منظوری وزیراعظم دیں گے اور اس پر عملدرآمد کی ماہانہ بنیادوں پر نگرانی کی جائے گی۔