پاسداران انقلاب کا آبنائے ہرمز میں آئل ٹینکر پر حملہ، قبضے کا دعویٰ

ایران کے پاسدارانِ انقلاب (IRGC) نے ایک بار پھر آبنائے ہرمز میں اہم پیش قدمی کرتے ہوئے ٹوگو کے پرچم والے آئل ٹینکر ‘ٹرینڈ’ (Trend) کو نشانہ بنانے اور اپنے قبضے میں لینے کا بڑا دعویٰ کیا ہے۔ ایرانی سرکاری خبر رساں ادارے (IRNA) کی رپورٹ کے مطابق اس آئل ٹینکر کو جمعرات کی رات نشانہ بنایا گیا، جس کے بعد جہاز میں آگ بھڑک اٹھی اور اسے پیش قدمی سے روک کر مکمل طور پر تحویل میں لے لیا گیا۔

ایرانی پاسدارانِ انقلاب کی بحریہ کے کمانڈر ریئر ایڈمرل علی عظمیٰ نے اس کارروائی کا دفاع کرتے ہوئے دعویٰ کیا کہ مذکورہ ٹینکر نے امریکی فوج کی ترغیب و تحریض پر آبنائے ہرمز سے ایران کے مقرر کردہ بین الاقوامی راستے کے برخلاف گزرنے کی کوشش کی، جس کے نتیجے میں اسے فوراً ہدف بنایا گیا۔ تاہم، ایرانی حکام کی جانب سے فی الحال ٹینکر کی حتمی پوزیشن، کارروائی میں استعمال کیے گئے ہتھیاروں، عملے کے ممبران اور کارگو کے حجم سے متعلق مزید تفصیلی معلومات فراہم نہیں کی گئی ہیں۔

دوسری جانب، برطانیہ کی میری ٹائم ٹریڈ آپریشنز (UKMTO) نے بھی جمعہ (۱۸ ستمبر) کو اطلاع دی ہے کہ آبنائے ہرمز میں عمان کے ساحلی شہر خصب سے تقریباً ۱۶ ناٹیکل میل شمال مشرق میں ایک تشویشناک سیکیورٹی واقعہ پیش آیا، جہاں ایک ٹینکر کو نامعلوم پروجیکٹائل (پھینک کر مارے جانے والے ہتھیار) سے نشانہ بنایا گیا۔ برطانوی ادارے کے مطابق حملے کے بعد جہاز میں لگنے والی آگ کو بجھا دیا گیا ہے اور عملہ بالکل محفوظ رہا، تاہم یو کے ایم ٹی او نے متاثرہ جہاز کا نام ظاہر نہیں کیا جس کے باعث اس بات کی آزادانہ تصدیق نہیں ہو سکی کہ آیا یہ وہی آئل ٹینکر ’ٹرینڈ‘ تھا جس پر ایرانی پاسدارانِ انقلاب نے قبضے کا دعویٰ کیا ہے۔