چھوٹے کاروباروں کے لیے شریعہ کمپلائنٹ ڈیجیٹل فنانسنگ کی منظوری

سیکورٹیز اینڈ ایکسچینج کمیشن آف پاکستان (SECP) نے ملک میں معاشی سرگرمیوں کو فروغ دینے کے لیے چھوٹے اور درمیانے درجے کے کاروباروں کے لیے شریعہ کمپلائنٹ ڈیجیٹل فنانسنگ کی باضابطہ منظوری دے دی ہے۔ اس انقلابی سہولت کے تحت چھوٹے کاروباری افراد اور تاجر جدید ڈیجیٹل ایپلی کیشنز کے ذریعے ۳۰ لاکھ روپے تک کی آسان فنانسنگ حاصل کر سکیں گے، جس سے انہیں اپنے روزمرہ کاروباری معلالمات چلانے میں بڑی مدد ملے گی۔

ایس ای سی پی ترجمان کے مطابق اس سہولت کے تحت رجسٹرڈ افراد ‘شامل کار تاجر ایپ’ کے ذریعے منظور شدہ سپلائرز سے کاروباری سامان اور خام مال کی خریداری کے لیے فوری مالی امداد حاصل کر سکیں گے۔ اس نئ ڈیجیٹل فنانسنگ اسکیم کا بنیادی مقصد ان چھوٹے کاروباروں کو باضابطہ اور قانونی کریڈٹ نظام کے دائرہ کار میں لانا ہے جو ماضی میں بینکنگ سہولیات سے محروم تھے۔

چیئرمین ایس ای سی پی ڈاکٹر کبیر احمد سدھو نے اس حوالے سے بتایا کہ ڈیجیٹل ڈسٹری بیوشن نیٹ ورک کے ذریعے ان تمام کاروباروں تک قرضوں کی فراہمی ممکن بنائی جا رہی ہے جنہیں مالیاتی اداروں تک رسائی حاصل نہیں تھی۔ انہوں نے واضح کیا کہ ڈیجیٹل فنانسنگ کے دائرہ کار کو وسعت دینے کے ساتھ ساتھ صارفین کی معلومات اور حقوق کے تحفظ کو ہر صورت یقینی بنایا جا رہا ہے۔ ایس ای سی پی کے اعداد و شمار کے مطابق گزشتہ ایک سال کے دوران نان بینکنگ فنانشل کمپنیوں (NBFCs) نے چھوٹے کاروباروں کو ۲۵۳ ارب روپے کے قرضے فراہم کیے ہیں، جن سے ۲۵ لاکھ سے زائد افراد مستفید ہو چکے ہیں۔