غم انسان کی سوچ، فیصلہ کرنیکی صلاحیت اور یادداشت کو متاثر کرسکتا ہے: کنگ چارلس

برطانیہ کے بادشاہ کنگ چارلس نے اپنی آنجہانی اہلیہ شہزادی ڈیانا کے بھائی چارلس اسپینسر کی سخت تنقید کا غیر معمولی اور براہِ راست جواب دیتے ہوئے کہا ہے کہ گہرا غم انسان کی سوچ، فیصلہ کرنے کی صلاحیت اور یادداشت کو شدید متاثر کر سکتا ہے۔ شاہی محل کا یہ نادر ردعمل چارلس اسپینسر کی جلد شائع ہونے والی کتاب (یادداشتوں) پر سامنے آیا ہے، جس کی اقساط برطانوی اخبار ‘ڈیلی میل’ میں شائع کی جا رہی ہیں۔

چارلس اسپینسر نے اپنی کتاب میں دعویٰ کیا ہے کہ 1997ء میں شہزادی ڈیانا کی المناک موت کے فوری بعد اس وقت کے شہزادہ چارلس نے ان سے بات کرتے ہوئے کہا تھا: “یقین رکھیں ہم اسے جلد ہی بھول جائیں گے۔” انہوں نے انکشاف کیا کہ یہ گفتگو اس وقت ہوئی جب ڈیانا کے کمسن بچوں، شہزادہ ولیم اور شہزادہ ہیری کو اپنی والدہ کے جنازے کے تابوت کے پیچھے چلانے پر ان کے اور شاہی خاندان کے درمیان شدومد سے اختلاف جاری تھا، جبکہ اسپینسر خود اس قدم کے سخت خلاف تھے۔ شاہی محل نے ان دعووں پر تبصرہ کرتے ہوئے صدمے کے اثرات اور یادداشت کی نوعیت کو اس کا بنیادی سبب قرار دیا ہے۔