تاجر دوست آسان ٹیکس سکیم، رجسٹریشن کیلئے ایف بی آر کو اہداف مقرر

فیڈرل بورڈ آف ریونیو (FBR) نے ‘تاجر دوست آسان ٹیکس اسکیم’ کے تحت تاجروں اور دکانداروں کی رجسٹریشن کا عمل تیز کرنے کے لیے فیلڈ آفسز کو باضابطہ اہداف مقرر کر دیے ہیں۔ ایف بی آر کی ہدایت پر تمام بڑے شہروں کی فیلڈ فارمیشنز کو ذمہ داری سونپی گئی ہے کہ وہ مخصوص رجسٹریشن سینٹرز قائم کر کے تاجروں کی بڑے پیمانے پر رجسٹریشن یقینی بنائیں۔ ذرائع کے مطابق آسان ٹیکس اسکیم کے تحت اب تک محض 200 کے قریب تاجروں نے اپنے ٹیکس گوشوارے جمع کروائے ہیں، جو کہ مقررہ سرکاری ہدف سے کافی کم ہیں۔

وزارتِ خزانہ کے ذرائع کا کہنا ہے کہ تاجر برادری کی جانب سے گوشوارے جمع کرانے کے سست ردِعمل کے باعث ہی ایف بی آر کی فیلڈ فارمیشنز کو براہ راست متحرک کرنے اور میدان میں اتارنے کا فیصلہ کیا گیا ہے۔ تاہم اب تک اسکیم کی موبائل ایپ کے ذریعے تقریباً 5 ہزار تاجر اپنی رجسٹریشن حاصل کر چکے ہیں۔ تاجروں کی سہولت کے لیے فیصلہ کیا گیا ہے کہ چھوٹے تاجروں کو 30 ستمبر کے بعد رجسٹریشن کرانے کی صورت میں بھی ریلیف فراہم کیا جائے گا۔

حکومتی حکام کا کہنا ہے کہ تاجر دوست آسان ٹیکس اسکیم کا بنیادی مقصد ملک بھر کے چھوٹے تاجروں، دوکانداروں اور کاروباروں کو آسان طریقہ کار کے ذریعے ٹیکس نیٹ میں شامل کرنا ہے تا کہ ملکی معیشت کو دستاویز کیا جا سکے۔ ایف بی آر فیلڈ آفسز جلد ہی مختلف تجارتی مرکزوں میں خصوصی ڈیسک اور سینٹرز کا قائم عمل میں لائیں گے تا کہ تاجروں کو رجسٹریشن کے عمل میں بلا تاخیر امداد فراہم کی جا سکے۔