پٹرولیم مصنوعات کی بڑھتی قیمتیں، حکومت کا سمارٹ لاک ڈاؤن لگانے کا فیصلہ

پٹرولیم مصنوعات کی بین الاقوامی اور مقامی قیمتوں میں مسلسل اضافے کے پیشِ نظر وفاقی حکومت نے ملک میں ایندھن کی بچت اور نقل و حمل کو محدود کرنے کے لیے ‘پٹرولیم سمارٹ لاک ڈاؤن’ نافذ کرنے کا بڑا فیصلہ کر لیا ہے۔ وزیراعظم شہباز شریف کی زیرِ صدارت منعقدہ اعلیٰ سطح کے اجلاس میں پٹرولیم بحران کے معاشی اثرات کو کم کرنے اور سرکاری و عوامی سطح پر ایندھن کے استعمال میں فوری کمی لانے سے متعلق مختلف ہنگامی تجاویز کا تفصیلی جائزہ لیا گیا۔

ذرائع کے مطابق مجوزہ سمارٹ لاک ڈاؤن کے تحت سرکاری و نجی دفاتر میں ہفتے میں صرف چار دن کام کرنے کی تجویز پیش کی گئی ہے، جبکہ جمعہ، ہفتہ اور اتوار کے روز مکمل چھٹی کر کے گاڑیوں کی آمد و رفت اور پٹرول کے استعمال میں کمی لانے کا پلان زیرِ غور ہے۔ اس کے علاوہ سرکاری ملازمین کے لیے ‘ورک فرام ہوم’ اور روٹیشن کے تحت کام کرنے کا فارمولا تیار کیا جا رہا ہے، جب کہ ایندھن کی بچت کی خاطر 50 فیصد سرکاری گاڑیوں کو عارضی طور پر بند (گراؤنڈ) کرنے کی بھی مضبوط تجویز شامل ہے۔

اجلاس میں نہ صرف دفاتر بلکہ کاروباری شعبے کے حوالے سے بھی سخت فیصلوں پر غور کیا جا رہا ہے، جس کے تحت ہفتے میں تین روز تجارتی مرکز و بازار بند رکھنے اور مارکیٹوں کے اوقاتِ کار محدود کرنے کی تجاویز شامل ہیں۔ ذرائع کا کہنا ہے کہ پٹرولیم سمارٹ لاک ڈاؤن کے اس عبوری پلان کے تمام جزیات پر حتمی مشاورت مکمل کی جا چکی ہے اور وزیراعظم کی منظوری کے بعد اس پالیسی کا باضابطہ حتمی فیصلہ اور اعلان جلد متوقع ہے۔