اسلام آباد اور راولپنڈی کے مختلف علاقوں میں تیز ہواؤں کے ساتھ موسلادھار بارش

پاکستان کے مختلف شہروں میں تیز ہواؤں اور گرج چمک کے ساتھ موسلادھار بارش کے نتیجے میں گرمی اور حبس کا زور ٹوٹ گیا اور موسم انتہائی خوشگوار ہو گیا۔ وفاقی دارالحکومت اسلام آباد اور جڑواں شہر راولپنڈی کے بیشتر علاقوں جن میں مری روڈ، صادق آباد، راجا بازار، شمس آباد، کچہری، نیو کٹاریاں، چکلالہ اور پیرودہائی شامل ہیں، میں زوردار بارش ریکارڈ کی گئی۔ محکمہ موسمیات کے مطابق راولپنڈی میں مجموعی طور پر 30 ملی میٹر جبکہ اسلام آباد کے مختلف علاقوں بشمول گولڑہ میں 18 اور بوکڑہ میں 15 ملی میٹر بارش ریکارڈ کی گئی، جس کے باعث نالہ لئی میں کٹاریاں کے مقام پر پانی کی سطح ساڑھے 5 فٹ تک بلند ہو گئی۔

جڑواں شہروں کے علاوہ سندھ اور خیبر پختونخوا میں بھی بادل خوب برسے۔ کراچی کے مختلف حصوں سمیت حیدرآباد اور صوبہ سندھ کے دیگر اضلاع میں موسلادھار بارش ہوئی، جبکہ پشاور اور بالائی خیبر پختونخوا کے علاقوں میں بارانِ رحمت سے شہریوں کے چہرے کھل اٹھے۔ بارش کے باعث متعدد شہروں کے نشیبی علاقوں میں پانی جمع ہو گیا، جسے نکالنے کے لیے مقامی انتظامیہ اور واٹر اینڈ سیوریج ڈسپوزل اتھارٹیز (واسا) کو متحرک کر دیا گیا ہے۔

دوسری جانب نیشنل ڈیزاسٹر مینجمنٹ اتھارٹی (این ڈی ایم اے) نے 17 ستمبر تک ملک کے مختلف خطوں میں متوقع شدید بارشوں کے پیشِ نظر الرٹ جاری کر دیا ہے۔ این ڈی ایم اے کے مطابق پنجاب کے متعدد اضلاع اور بالائی خیبر پختونخوا میں مزید بارشیں متوقع ہیں، جس سے نشیبی علاقوں کے زیرِ آب آنے اور پہاڑی ندی نالوں میں طغیانی کا خدشہ ہے۔ ادارے نے تمام مربوطہ بالادست و مقامی اداروں کو ہنگامی اقدامات مکمل رکھنے اور شہریوں کو ندیاں پار کرنے یا سفر کے دوران احتیاط برتنے کی ہدایت کی ہے۔