ایران کا شرائط پوری ہونے تک امریکا سے مذاکرات سے پھر انکار

ایران کی ایکسپیڈینسی ڈسکرنمنٹ کونسل کے رکن اور سابق پاسدارانِ انقلاب کے کمانڈر محسن رضائی نے خبردار کیا ہے کہ امریکی صدر کے متضاد اور غیر مستقل بیانات سے عالمی برادری گمراہ نہ ہو۔ اپنے ایک بیان میں انہوں نے کہا کہ واشنگٹن کی پالیسی غیر مستحکم ہے، امریکی انتظامیہ کبھی تہران کے ساتھ کسی بھی قسم کے مذاکرات کا یکسر انکار کرتی ہے تو کبھی اچانک ہی مذاکراتی میز پر آنے کا شوشہ چھوڑ دیتی ہے۔ محسن رضائی نے واضح کیا کہ خطے میں عالمی تیل کی فراہمی اور سمندری حدود سے متعلق تزویراتی معاملات اب یکسر بدل چکے ہیں۔

ایرانی رہنما نے صراحت کے ساتھ کہا کہ جب تک ایران کی عائد کردہ تمام پیشگی شرائط پوری نہیں کی جاتیں، امریکہ کے ساتھ کسی بھی قسم کے سیاسی یا سفارتی مذاکرات شروع نہیں ہو سکتے۔ انہوں نے اعادہ کیا کہ ایران اپنی قومی سلامتی اور اقتصادی مفادات کے تحفظ کے لیے عائد کی گئی شرائط پر مکمل طور پر قائم ہے اور امریکہ کی جانب سے پیش کی جانے والی غیر سنجیدہ اور غیر مستقل پیشکشوں کے دباؤ میں نہیں آئے گا۔