عراق کا ایران کے ساتھ 3 سرحدی گزرگاہوں پر آمدورفت بحال کرنے کا اعلان

بغداد: سعودی ایسٹ ویسٹ آئل پائپ لائن پر ہونے والے ڈرون حملے کے بعد احتیاطی تدابیر کے تحت عارضی طور پر بند کی گئی ایران کے ساتھ اپنی تین اہم سرحدی گزرگاہوں پر عراق نے مسافروں اور تجارتی آمدورفت کی بحالی کا باقاعدہ اعلان کر دیا ہے۔

بین الاقوامی خبر رساں ایجنسیوں کے مطابق عراقی حکام نے تصدیق کی ہے کہ ایران کی سرحد سے متصل اہم ‘الشیب’ سرحدی گزرگاہ کو عام مسافروں کی آمدورفت کے لیے دوبارہ کھول دیا جائے گا۔ اس کے ساتھ ساتھ بصرہ کے قریب واقع ‘شلمچہ’ سرحدی گزرگاہ پر بھی مسافروں کی نقل وحرکت کو فوری طور پر فعال کر دیا گیا ہے۔

عراقی حکام کا مزید کہنا تھا کہ شلمچہ سرحدی پوائنٹ پر صرف مسافر ہی نہیں بلکہ تجارتی سامان کی برآمدات و واردات کی سرگرمیاں بھی رواں ہفتے کے اختتام تک مکمل طور پر بحال کر دی جائیں گی تاکہ دوطرفہ تجارت متاثر نہ ہو۔

واضح رہے کہ سعودی آئل پائپ لائن پر عراق کی سرزمین سے ڈرون داغے جانے کے شواہد اور سیکیورٹی تحریکات سامنے آنے کے بعد عراقی حکومت نے سیکورٹی کا جائزہ لینے کے لیے ایران سے ملحقہ بعض حساس سرحدی گزرگاہوں کو عارضی طور پر مسدود کر دیا تھا۔