انڈونیشیا میں بحری جہاز خراب موسم کی لپیٹ میں آ گیا، 102 مسافر بچا لیے گئے، 140 تاحال لاپتا

جکارتہ: انڈونیشیا میں خراب موسم اور سمندری طوفان کے باعث 243 مسافروں سے بھرا ایک مسافر بحری جہاز (فیری) جاوا سی میں حادثے کا شکار ہو کر لاپتا ہو گیا ہے، جس کے بعد بڑے پیمانے پر ریسکیو آپریشن شروع کر دیا گیا ہے۔غیر ملکی خبر رساں ایجنسیوں کے مطابق مسافر بحری جہاز جاوا کے معروف شہر سورابایا سے بورنیو جزیرے کے جنوبی کالیمانتان صوبے کے شہر بنجرماسن کی طرف جا رہا تھا کہ راستے میں اچانک اس کا کوسٹ گارڈ اور متعلقہ حکام سے رابطہ منقطع ہو گیا۔انڈونیشیا کے نیشنل سرچ اینڈ ریسکیو آفس کے ترجمان نے بتایا کہ جہاز کی آخری معلوم پوزیشن جاوا سی (Java Sea) میں بنجرماسن بندرگاہ سے تقریباً 148 کلومیٹر کے فاصلے پر ریکارڈ کی گئی تھی۔ حادثے کا علم ہوتے ہی امدادی ٹیموں اور بحری جہازوں کو لاپتا فیری کی تلاش اور مسافروں کی نجات کے لیے فوری روانہ کر دیا گیا۔ریسکیو حکام نے تازہ ترین اپ ڈیٹ میں بتایا کہ اب تک 103 مسافروں کو سمندر سے بحفاظت نکال کر ریسکیو کر لیا گیا ہے، تاہم ان میں سے ایک شدید زخمی شخص دورانِ علاج ہسپتال میں دم توڑ گیا۔حکام کا کہنا ہے کہ جہاز میں سوار 140 کے قریب دیگر مسافروں کی تلاش کے لیے جاوا سی کے متاثرہ علاقے میں سرچ اینڈ ریسکیو آپریشن پوری شدت سے جاری ہے، لیکن خراب موسم اور سمندری لہروں کے باعث امدادی کارروائیوں میں مشکلات کا سامنا ہے۔