سعودی شہر جازان پر حوثیوں کا حملہ: عمارتیں اور گاڑیاں نشانہ، 2 افراد زخمی

سعودی عرب کے جنوبی سرحدی علاقے جازان پر یمن کے حوثی باغیوں کی جانب سے داغا گیا ایک ناریہ مقذوف (پروجیکٹائل) آ گرا، جس کے نتیجے میں 2 افراد زخمی ہو گئے جبکہ ایک مسجد، متعدد شہری عمارتوں اور گاڑیوں کو شدید نقصان پہنچا ہے۔ سعودی سول ڈیفنس کی جانب سے جاری کردہ بیان کے مطابق واقعے کے فوراً بعد امدادی ٹیموں نے جازان کے سرحدی علاقے ’الطوال‘ میں کارروائیاں کرتے ہوئے زخمیوں کو علاج کے لیے منتقل کیا۔ سعودی حکام نے بالخصوص شہری آبادی اور تنصیبات کو نشانہ بنانے کے اقدام کو بین الاقوامی انسانی قوانین کی کھلی خلاف ورزی قرار دیا ہے۔

جازان میں ہونے والا یہ تازہ حملہ جنوبی سعودی عرب پر حوثیوں کے روزافزوں میزائل اور ڈرون حملوں کی لہر کا حصہ ہے۔ اس سے قبل منگل کے روز ابہا، خمیس مشیط، جازان اور نجران میں شہری اور معاشی تنصیبات پر کیے گئے حوثی حملوں کے نتیجے میں کم از کم 73 افراد زخمی ہوئے تھے، جس سے خطے میں سیکیورٹی صورتِ حال مزید کشیدہ ہو گئی ہے۔