ایران اور عمان میں طے پانے والی مفاہمت کے تحت آبنائے ہرمز دوبارہ نہیں کھولی جائے گی: ایرانی میڈیا

ایرانی میڈیا نے دعویٰ کیا ہے کہ ایران اور عمان کے درمیان طے پانے والی تازہ ترین سفارتی مفاہمت کے باوجود آبنائے ہرمز کو فوری طور پر تمام بحری ٹریفک کے لیے نہیں کھولا جائے گا۔ ایرانی خبر رساں ادارے ’تسنیم‘ کے مطابق باخبر ذرائع نے تصدیق کی ہے کہ دونوں ممالک کے درمیان خلیج فارس میں داخلے اور اخراج کے نئے بحری راستوں کی فنی تفصیلات پر اتفاق تو ہو چکا ہے، تاہم اس کی باضابطہ بحالی اب بھی امریکہ کی جانب سے ایرانی شرائط کے قبول کیے جانے سے مشروط ہے۔

رپورٹ کے مطابق نئے پلان کے تحت خلیج فارس میں داخلے کا راستہ مکمل طور پر اور باہر نکلنے کے راستے کا ایک بڑا حصہ ایرانی علاقائی پانیوں سے ہو کر گزرے گا۔ ذرائع کا کہنا ہے کہ آبنائے ہرمز کا جنوبی راستہ فی الحال مکمل طور پر بند رہے گا، حالانکہ امریکہ اس راستے کو کھلا رکھنے کے لیے مسلسل بین الاقوامی دباؤ ڈال رہا ہے۔ ایرانی حکومت نے واضح کر دیا ہے کہ آبنائے ہرمز کی مکمل بحالی کا حتمی فیصلہ اس بات پر منحصر ہوگا کہ واشنگٹن ایران کی پیش کردہ شرائط اور مطالبات پر کس حد تک عمل درآمد کرتا ہے۔