امریکا محاصرہ اور جارحیت ختم کرے تو آبنائے ہرمز کھول دیں گے، ایرانی صدر

ایران کے صدر مسعود پزشکیان نے واضح کیا ہے کہ اگر امریکہ اپنے جارحانہ اقدامات اور بحری محاصرہ ختم کر دے تو ایران آبنائے ہرمز کے راستے کو ٹریفک کے لیے کھول دے گا۔ میڈیا سے گفتگو کرتے ہوئے ایرانی صدر کا کہنا تھا کہ واشنگٹن کی یہ بھول ہے کہ وہ ناکہ بندی کے ذریعے ایران کو دباؤ میں لا سکتا ہے، انہوں نے زور دیا کہ ایرانی قوم امریکی اقدامات سے ڈرنے والی نہیں اور نہ ہی ایران کا تمام تر انحصار صرف بحری راستے پر ہے۔

صدر مسعود پزشکیان نے بتایا کہ پیر کے روز عمان میں عرب ممالک کے وزرائے خارجہ کا ایک اہم اجلاس بلا لیا گیا ہے، جس میں ایران اور عمان آبنائے ہرمز کے مشترکہ بحری راستے کے حوالے سے ایک اہم معاہدے پر دستخط کریں گے اور اسے باضابطہ طور پر بین الاقوامی میری ٹائم آرگنائزیشن (IMO) کے سامنے بھی پیش کیا جائے گا۔ دوسری جانب ایرانی پارلیمان کی قومی سلامتی کمیٹی کے سربراہ ابراہیم عزیزی نے سخت موقف اختیار کرتے ہوئے واضح کیا ہے کہ جب تک ایران کی بنیادی شرائط اور مطالبات تسلیم نہیں کیے جاتے، اس وقت تک امریکہ کے ساتھ کسی بھی قسم کے مذاکرات بے سود اور ناممکن ہیں