یوکرین سے مذاکرات کیلئے تیار، خصوصی فوجی آپریشن نہیں روکیں گے: لاوروف

روس کے وزیر خارجہ سرگئی لاوروف نے واضح کیا ہے کہ ماسکو یوکرین کے ساتھ سفارتی مذاکرات کی بحالی کے لیے مکمل طور پر تیار ہے، تاہم بات چیت کے عمل کے دوران بھی یوکرین میں جاری ‘خصوصی فوجی آپریشن’ کو کسی صورت معطل نہیں کیا جائے گا۔ ماسکو میں صحافیوں سے گفتگو کرتے ہوئے روسی وزیر خارجہ کا کہنا تھا کہ اگر یوکرینی صدر ولادیمیر زیلنسکی واقعی روسی صدر ولادیمیر پوتن سے ملاقات اور مذاکرات کے خواہش مند ہیں تو انہیں خود ماسکو آنا ہو گا۔

سرگئی لاوروف نے کہا کہ زیلنسکی کو ماسکو آنے کی دعوت دینا روس کی جانب سے خیرسگالی کا ایک بہت بڑا مظاہرہ ہے، کیونکہ یوکرینی صدر نے ابھی تک روس کے ساتھ مذاکرات پر پابندی کا اپنا سرکاری حکم نامہ بھی منسوخ نہیں کیا۔ انہوں نے اعادہ کیا کہ روس کی جانب سے سفارتی راستے اختیار کرنے میں کوئی ہچکچاہٹ یا خیرسگالی کی کمی نہیں، تاہم میدانِ جنگ میں جاری فوجی کارروائیاں مذاکرات کے ابتدائی مرحلے یا عمل کے دوران روکی نہیں جائیں گی۔