انصاراللہ کی اہم ساحلی علاقوں کا کنٹرول سنبھالنے پر باب المندب میں پٹرولنگ

یمن کی تنظیم انصار اللہ (حوثیوں) نے اہم سٹریٹجک ساحلی علاقوں پر مکمل کنٹرول حاصل کرنے کے بعد عالمی سمندری راستے ’باب المندب‘ میں باقاعدہ بحری پٹرولنگ کا آغاز کر دیا ہے، جس کے بعد ساحلی علاقوں پر جشن کا سماں بندھ گیا اور صنعاء میں بھی حوثیوں کی پیش قدمی کے حق میں بڑی ریلی نکالی گئی۔ حوثی جنگجوؤں نے باب المندب میں واقع انتہائی اہم جزیرے ‘میون’ کے ساتھ ساتھ بحیرہٴ احمر کے ساحل پر واقع شہر ‘ذباب’ اور ساحلی شہر ‘المخا’ میں ہیومینیٹرین تنصیبات کا کنٹرول بھی اپنے ہاتھ میں لے لیا ہے، جس کا بنیادی مقصد اس عالمی تجارتی شاہراہ پر اپنی گرفت مضبوط کرنا ہے۔

دوسری جانب، حوثی وزارتِ صحت نے دعویٰ کیا ہے کہ 3 ستمبر سے اب تک سعودی قیادت میں کیے جانے والے فضائی حملوں کے نتیجے میں 82 افراد ہلاک یا زخمی ہو چکے ہیں۔ ادھر صورتِ حال کی سنگینی کے پیشِ نظر یمنی سرکاری فوج کے ترجمان نے کہا ہے کہ یمنی فضائیہ نے اپنے حلیفوں کے ساتھ مل کر پہلے سے واضح کیے گئے ‘کل باکس’ (Kill Box) کے اندر حوثی مواضع پر بمباری کا آغاز کر دیا ہے تاکہ ان کی پیش قدمی کو روکا جا سکے۔