ایران زخمی جانور کی طرح آخری وقت میں ہے، امریکی وزیر خزانہ کا دعویٰ

واشنگٹن: امریکی وزیرِ خزانہ اسکاٹ بیسنٹ نے تہران پر الزامات کی بوچھاڑ کرتے ہوئے کہا ہے کہ ایران امریکی معیشت میں مشکلات پیدا کرنے کی ناکام کوششیں کر رہا ہے، جبکہ امریکی فورسز نے ایران کی 85 فیصد میزائل فیکٹریاں تباہ کر دی ہیں۔

میڈیا کے ساتھ گفتگو کے دوران امریکی وزیرِ خزانہ نے ایرانی قیادت، ان کے بیانات اور خطے میں جاری کشیدگی کے تناظر میں سخت گیر موقف اختیار کیا۔

 اسکاٹ بیسنٹ نے دعویٰ کیا کہ امریکی حملوں میں ایران کی 85 فیصد میزائل بنانے والی فیکٹریاں تباہ ہو چکی ہیں، تاہم تہران ان تباہ شدہ تنصیبات کو دوبارہ تعمیر کرنے کی کوشش کر رہا ہے۔ امریکی وزیرِ خزانہ کا کہنا تھا کہ ایران کی جانب سے جاری کردہ بیانات اور دعوے حقیقت کے بجائے خواہشات اور مفروضوں پر مبنی ہیں، جبکہ وہاں کی قیادت امریکا کو صرف گیدڑ بھبکیاں دے رہی ہے جو واشنگٹن کے لیے مضحکہ خیز ہیں۔ انہوں نے امریکی اور عالمی میڈیا کو تنقید کا نشانہ بناتے ہوئے کہا کہ میڈیا ایرانی دعووں کو بلاوجہ نمائش اور کوریج دے کر انہیں اپنا موقف پیش کرنے کا ناجائز موقع فراہم کر رہا ہے۔ اسکاٹ بیسنٹ نے ایران کی موجودہ سیاسی و ملٹری صورتِ حال کو ایک ‘زخمی جانور’ سے تشبیہ دیتے ہوئے دعویٰ کیا کہ ایرانی حکومت اپنے آخری ایام گن رہی ہے اور یہ ان کے مرتے ہوئے نظام کی آخری سانسیں اور ناکام کوششیں ہیں۔