ایران کی آئی اے ای اے پر کڑی تنقید، جنگ کا جواز فراہم کرنے کا الزام

تہران: ایرانی وزارت خارجہ کے ترجمان اسماعیل بقائی نے بین الاقوامی جوہری توانائی ایجنسی (IAEA) کے ڈائریکٹر جنرل کو شدید تنقید کا نشانہ بناتے ہوئے ادارے پر اپنی غیرجانبداری، خودمختاری اور آزادی کو قربان کرنے کا الزام عائد کیا ہے۔

میڈیا سے گفتگو کرتے ہوئے اسماعیل بقائی نے کہا کہ بین الاقوامی جوہری توانائی ایجنسی کی تیار کردہ رپورٹس کو اب مخصوص ممالک کے خلاف سیاسی، سفارتی اور قانونی مقدمات بنانے کے لیے آلے کے طور پر استعمال کیا جا رہا ہے۔ انہوں نے الزام لگایا کہ آئی اے ای اے کی غیرجانبداری کو مخصوص طاقتوں کے سیاسی ایجنڈوں کے تابع کر دیا گیا ہے، جو اس بین الاقوامی ادارے کے قیام کے بنیادی مقاصد اور منشور کی صریح خلاف ورزی ہے۔ اسماعیل بقائی نے واضح کیا کہ بین الاقوامی امن و سلامتی کے تحفظ کے لیے قائم کیے گئے اداروں کو کسی ملک کے خلاف فوجی جارحیت یا جنگ کا جواز تراشنے والی سازش کا حصہ نہیں بننا چاہیے۔

سہولت کاروں کے احتساب کا مطالبہ: ایرانی ترجمان کا مزید کہنا تھا کہ کسی بھی ملک پر ہونے والی فوجی جارحیت اور جنگی جرائم کی ذمہ داری صرف حملہ آوروں تک محدود نہیں ہونی چاہیے، بلکہ ان تمام فریقین اور اداروں کا بھی احتساب ہونا چاہیے جو اس جارحیت کو سیاسی یا قانونی جواز فراہم کرنے کے سہولت کار بنتے ہیں۔