موخا ایئرپورٹ پر سعودی عرب کے 2 فضائی حملے، حوثی باب المندب کے قریب پہنچ گئے

صنعا: سعودی عرب نے یمن کے ساحلی شہر موخا کے ہوائی اڈے پر دو شدید فضائی حملے کیے ہیں، جس کے بعد بحیرۂ احمر کے ساحلی علاقوں میں جاری جنگ میں شدید تناؤ پیدا ہو گیا ہے۔

حوثی میڈیا کے مطابق سعودی جنگی طیاروں نے موخا ایئرپورٹ کو براہِ راست نشانہ بنایا، تاہم ان حملوں میں ہونے والے جانی یا مالی نقصان کی حتمی اور فوری تفصیلات سامنے نہیں آ سکیں۔

یہ فضائی کارروائی ایک ایسے وقت میں ہوئی ہے جب حوثی جنگجوؤں نے ساحلی شہر موخا کا کنٹرول حاصل کر لیا تھا۔ حوثیوں کی جانب سے سعودی حمایت یافتہ یمنی حکومتی فورسز کے خلاف شروع کی گئی وسیع پیمانے کی کارروائی کے بعد مختلف ساحلی محاذوں پر جھڑپیں شدت اختیار کر چکی ہیں۔

یمنی حکومتی ذرائع نے بین الاقوامی خبر رساں ادارے رائٹرز کو بتایا کہ حوثی جنگجو پیش قدمی کرتے ہوئے باب المندب آبنائے کے قریب واقع اہم شہر ‘ذباب’ تک پہنچ گئے ہیں، جو جزیرۂ پریم (Perim Island) کے بالکل سامنے واقع ہے۔ذباب اور جزیرۂ پریم کا کنٹرول عالمی بحری شاہراہ ‘باب المندب’ پر اثر و رسوخ قائم کرنے کے لیے انتہائی کلیدی سمجھا جاتا ہے۔ یہ آبنائے بحیرۂ احمر کو خلیجِ عدن سے ملاتی ہے اور ایشیا و یورپ کے درمیان عالمی تجارتی سامان اور توانائی کی ترسیل کا بڑا ذریعہ ہے۔ اگرچہ جمعرات کو باب المندب سے 26 تجارتی جہاز بحفاظت گزرے، تاہم ایران اور امریکا کی کشیدگی کے تناظر میں حوثیوں کی اس پیش قدمی نے عالمی بحری آمدورفت، توانائی کی ترسیل اور خطے کی سیکیورٹی پر شدید خطرات کے بادل منڈلا دیے ہیں۔