مشرقی چین میں مال بردار جہاز میں خوفناک آتشزدگی، 20 افراد ہلاک

بیجنگ: مشرقی چین کے ساحلی شہر چنگ ڈاؤ کے ایک شپ یارڈ میں مرمت کے لیے موجود غیر ملکی پرچم والے مال بردار جہاز میں اچانک خوفناک آگ بھڑک اٹھنے سے 20 افراد ہلاک ہو گئے ہیں۔

چینی ذرائع ابلاغ کے مطابق حادثے کے وقت جہاز پر مجموعی طور پر 42 افراد سوار تھے، جن میں سے امدادی ٹیموں نے 12 افراد کو بحفاظت باہر نکال لیا۔ آتشزدگی کے اس دردناک واقعے میں 5 افراد شدید زخمی بھی ہوئے جنہیں فوری طبی امداد کے لیے پاس کے اسپتال منتقل کر دیا گیا ہے جہاں ان کا علاج جاری ہے۔ فائر فائٹرز اور ریسکیو اہلکاروں نے تین گھنٹے سے زائد کی مسلسل جدوجہد کے بعد آگ پر مکمل قابو پا لیا۔

واقعے کے فوری بعد چینی صدر شی جن پنگ اور وزیراعظم لی چیانگ نے حادثے میں جانی نقصان پر گہرے دُکھ اور افسوس کا اظہار کیا ہے۔ انہوں نے متعلقہ اداروں کو جائے حادثہ پر امدادی کارروائیاں تیز کرنے، متاثرین اور ان کے لواحقین کو ہر ممکن سرکاری تعاون اور طبی سہولیات فراہم کرنے کی سخت ہدایت جاری کی ہے۔ حادثے کی وجوہات جاننے کے لیے تحقیقات کا آغاز کر دیا گیا ہے۔