جوہری توانائی ایجنسی نے امریکا، اتحادیوں کے دباؤ پر قرارداد منظور کی: ایران

ایران نے اقوامِ متحدہ کے ایٹمی نگران ادارے انٹرنیشنل اٹامک انرجی ایجنسی (IAEA) کے بورڈ آف گورنرز کی جانب سے منظور کی گئی اس تادیبی قرارداد کی شدید الفاظ میں مذمت کی ہے، جس کے تحت جوہری عدم تعاون کے معاملے پر ایران کا کیس اقوامِ متحدہ کی سلامتی کونسل کو بھیجنے کی منظوری دی گئی۔ تہران نے واضح کیا ہے کہ یہ اقدام محض سیاسی انتقام پر مبنی ہے اور ایجنسی نے مکمل طور پر مغربی طاقتوں کی ایما پر کام کیا ہے۔

آئی اے ای اے میں ایران کے مستقل مندوب رضا نجفی نے سرکاری ٹیلی ویژن پر گفتگو کرتے ہوئے کہا کہ یہ قرارداد امریکہ اور اس کے یورپی اتحادیوں کے شدید سیاسی دباؤ اور ہتھکنڈوں کے تحت پاس کی گئی ہے۔ انہوں نے زور دے کر کہا کہ اس نام نہاد قرارداد کی کوئی قانونی یا اخلاقی بنیاد نہیں ہے اور نہ ہی اس نوعیت کی یکطرفہ کارروائیوں سے مغربی طاقتوں کے حق میں کوئی نتیجہ برآمد ہوگا۔ ایران نے متنبہ کیا ہے کہ سیاسی مقاصد کے لیے ایٹمی ادارے کے استعمال سے معاملات مزید سدھرنے کے بجائے کشیدگی کی نئی راہ ہموار ہوگی۔