برطانوی فضائی ٹریفک کنٹرول میں بڑی فنی خرابی، حکومت کا ایک ہفتے میں تحقیقات کا حکم

برطانیہ کے فضائی ٹریفک کنٹرول سسٹم میں اچانک پیدا ہونے والی شدید فنی خرابی کے بعد برطانوی حکومت نے ایئر ٹریفک کنٹرول فراہم کرنے والے قومی ادارے ‘نیٹس’ (NETS) کو ایک ہفتے کے اندر معاملے کی مکمل تحقیقات کر کے رپورٹ پیش کرنے کا حکم دے دیا ہے۔ اس سسٹم فالٹ کے باعث برطانیہ بھر کے تمام بڑے ایئرپورٹس پر فلائٹ آپریشن کئی گھنٹوں تک معطل اور درہم برہم رہا، جس کے نتیجے میں 2,000 سے زائد پروازیں منسوخ ہوئیں اور لاکھوں ملکی و غیر ملکی مسافر شدید مشکلات کا شکار ہوئے۔

برطانوی ٹرانسپورٹ وزیر ہائیڈی الیگزینڈر نے نیٹس کے چیف ایگزیکٹو مارٹن رولف کو طلب کر کے صورتحال پر شدید تحفظات کا اظہار کیا۔ وزیر ٹرانسپورٹ کا کہنا تھا کہ ابتدائی جائزے کے مطابق یہ واقعہ کوئی سائبر حملہ معلوم نہیں ہوتا، تاہم یہ کوئی ایسا مسئلہ بھی نہیں تھا جسے روکا نہ جا سکتا ہو۔ حکومت نے سول ایوی ایشن اتھارٹی کے ذریعے ایک آزاد تحقیقاتی کمیٹی قائم کرنے کا بھی اعلان کیا ہے جو چھ ماہ کے اندر حتمی رپورٹ پیش کرے گی۔ دوسری جانب ایئرلائنز نے شکوہ کیا ہے کہ اس خلل نے برطانوی ایئر ٹریفک کنٹرول کی بنیادی خامیوں کو بے نقاب کر دیا ہے۔ متاثرہ مسافروں کو ٹکٹ ریفنڈ، متبادل پروازوں، اور قیام و طعام کے اخراجات کی ادائیگی تو کی جائے گی، تاہم حکام کے مطابق اضافی مالی معاوضہ ملنے کا امکان انتہائی کم ہے۔