بحری جہازوں کیخلاف کسی بھی جارحیت کا سخت جواب دیا جائے گا: ایرانی عسکری قیادت

ایران اور امریکہ کے درمیان جاری براہِ راست فوجی کشیدگی شدید ترین سطح پر پہنچ گئی ہے۔ ایرانی عسکری قیادت نے امریکہ کو کڑے نتائج سے خبردار کرتے ہوئے واضح کیا ہے کہ ایرانی بحری جہازوں کے خلاف کسی بھی قسم کی جارحانہ کارروائی کا سخت ترین ردِعمل دیا جائے گا، جبکہ اسٹریٹجک لحاظ سے اہم گزرگاہ آبنائے ہرمز میں ایرانی نگرانی اور دفاعی نظام کو مکمل طور پر فعال قرار دے دیا گیا ہے۔ ایرانی مسلح افواج کے چیف آف جنرل اسٹاف علی عبداللہی نے دوٹوک انداز میں کہا کہ ایرانی بحری و تجارتی جہازوں پر کسی بھی قسم کا حملہ برداشت نہیں کیا جائے گا اور اگر واشنگٹن نے ایسی کوئی کوشش کی تو اس کے جواب میں خطے میں قائم امریکی فوجی اڈوں کو براہِ راست نشانہ بنایا جائے گا۔

دوسری جانب ایرانی پاسدارانِ انقلاب (IRGC) کے ترجمان بریگیڈیئر جنرل حسین محبی نے آبنائے ہرمز میں ایرانی دفاعی صلاحیتوں کا دفاع کرتے ہوئے کہا کہ کوئی بھی جدید ترین امریکی یا مغربی ٹیکنالوجی ایران کے نگران نظام کو عبور نہیں کر سکتی، اور خلیجِ فارس کی سمندری حدود کا کنٹرول مکمل طور پر ایران کے باصلاحیت نوجوانوں اور مسلح فورسز کے ہاتھ میں ہے۔ انہوں نے امریکہ پر سخت تنقید کرتے ہوئے خبردار کیا کہ واشنگٹن کو خطے میں مداخلت کے بجائے خود کو کیوبا کے ساحلوں تک محدود رکھنا چاہیے۔ ایرانی حکام کے یہ سخت بیانات ایک ایسے وقت میں سامنے آئے ہیں جب حال ہی میں امریکی فورسز کی جانب سے ایرانی آئل ٹینکرز کو تباہ کرنے اور ایران کی جانب سے امریکی بحری و عسکری اہداف پر جوابی بیلسٹک میزائل حملوں کے بعد خلیج کی صورتحال انتہائی خطرناک صورتِ حال اختیار کر چکی ہے