دہلی کے سابق چیف سیکرٹری نے خودکشی کرلی

نئی دہلی: بھارتی دارالحکومت دہلی کے سابق چیف سیکرٹری اور 1975ء بیچ کے سینئر سابق آئی اے ایس (IAS) افسر 75 سالہ راکیش مہتا نوئیڈا کے سیکٹر 82 میں واقع اپنے فلیٹ میں پراسرار طور پر مردہ حالت میں پائے گئے ہیں۔

پولیس حکام کے مطابق راکیش مہتا نے 6 ستمبر کو اپنے فلیٹ میں مبینہ طور پر گلے میں پھندا ڈال کر خودکشی کی۔ پولیس نے موقعِ واردات سے ایک صفحے کا دستی یادداشت (سائڈ نوٹ) بھی برآمد کیا ہے، جس میں انہوں نے طویل بیماری، بلڈ پریشر، شوگر اور دیگر شدید جسمانی و ذہنی صحت کے مسائل کو اس انتہائی قدم کی وجہ قرار دیا ہے اور کسی کو ذمہ دار نہیں ٹھہرایا۔

واقعے کے وقت ان کی اہلیہ جو خود سابق بیوروکریٹ ہیں اور بیٹا دہرادون میں موجود تھے۔ بارہا فون کالز کا جواب نہ ملنے پر اہل خانہ نے سوسائٹی کے سیکورٹی گارڈز کو اطلاع دی، جنہوں نے فلیٹ میں داخل ہو کر لاش دیکھی۔ پولیس کی فارنزک ٹیم نے جائے وقوعہ سے شواہد اکٹھے کر لیے ہیں، جبکہ قانونی کارروائی اور پوسٹ مارٹم کے بعد جسدِ خاکی ورثا کے حوالے کر دیا گیا ہے۔ واضح رہے کہ راکیش مہتا 2007ء سے 2010ء تک دہلی کے چیف سیکرٹری رہے اور 2010ء کے کامن ویلتھ گیمز کی انتظامی باگ ڈور بھی انہی کے پاس تھی۔