امریکی بحری جہازوں کیلئے خطے میں کوئی جگہ محفوظ نہیں رہے گی: ایران

ایرانی پارلیمانی قومی سلامتی و خارجہ پالیسی کمیشن کے ترجمان ابراہیم رضائی نے خطے میں جاری کشیدگی پر سخت ردِعمل دیتے ہوئے کہا ہے کہ الشرق الاوسط میں امریکی بحری جہازوں، جنگی بیڑوں اور عسکری تنصیبات کے لیے کوئی بھی جگہ محفوظ نہیں رہے گی۔ میڈیا سے گفتگو کرتے ہوئے انہوں نے انکشاف کیا کہ ایران نے حال ہی میں سمندر میں موجود امریکی بحری جہازوں کے فرضی ہدف پر جدید ترین میزائل حملوں کا کامیاب تجربہ کیا ہے، جبکہ تنازعات و ناگوار حالات کے دوران اور اس کے بعد بھی ایرانی دفاعی صلاحیتوں کو وسعت دینے اور تیز کرنے کا عمل بلا تعطل جاری ہے۔

ابراہیم رضائی نے زور دے کر کہا کہ دشمن کی جانب سے عائد پابندیوں، حملوں اور تمام تر دباؤ کے باوجود ایران کی فوجی اور صنعتی دفاعی پیشرفت نہ صرف رکی نہیں بلکہ مزید تیز ہوئی ہے۔ ایرانی پارلیمانی کمیشن کے ترجمان کا کہنا تھا کہ ایران کو دشمن کی جانب سے لاحق خطرات کی بدلتی نوعیت اور جغرافیائی صورتحال کے عین مطابق اپنی دفاعی، میزائل اور ڈرون صلاحیتوں کو مسلسل اپ گریڈ کر رہا ہے تاکہ خطے میں کسی بھی ممکنہ جارحیت کا فوری اور مؤثر جواب دیا جا سکے۔