ایران امریکا جنگ: یو اے ای نے متبادل تجارتی راستے بنانے شروع کردیے

متحدہ عرب امارات (یو اے ای) نے ایران اور امریکہ کے درمیان جاری کشیدگی اور ممکنہ جنگی حالات کے پیشِ نظر اپنی توانائی برآمدات اور معاشی سرگرمیوں کو محفوظ بنانے کے لیے متبادل تجارتی راستوں کی تیاری پر کام شروع کر دیا ہے۔ یو اے ای کے صدارتی مشیر ڈاکٹر انور قرقاش نے اپنے ایک بیان میں واضح کیا کہ ابوظہبی اپنی اقتصادی سرگرمیوں کو خطے میں جنگ اور تنازعات کا یرغمال نہیں بننے دے گا۔ اس سلسلے میں ملک کے مشرقی ساحلی علاقوں میں واقع بندرگاہوں کی صلاحیت و گنجائش میں اضافہ کیا جا رہا ہے، جبکہ ایندھن کی نقل وحمل کے لیے نئی پائپ لائنز، ریلوے نیٹ ورک اور دیگر متبادل بحری و بَرّی راستے تعمیری مراحل میں داخل ہو چکے ہیں۔

انور قرقاش نے خلیجی ممالک کی جانب سے ایرانی اقدامات کے خلاف اجتماعی اور مشترکہ ردعمل کو ناکافی قرار دیتے ہوئے کہا کہ خطے کی ریاستیں درپیش خطرات کا ادراک رکھنے کے باوجود ایک متحد اور مؤثر حکمتِ عملی بنانے میں ناکام رہیں۔ انہوں نے کہا کہ ایران کو اپنے ہمسایہ خلیجی ممالک کا اعتماد بحال کرنے میں کئی دہائیاں لگ سکتی ہیں، تاہم سفارتی سطح پر معاملات بہتر ہونے پر معمول کے تعلقات کی بحالی ممکن ہے۔ صدارتی مشیر نے یاد دہانی کرائی کہ متحدہ عرب امارات نے سلامتی اور اقتصادی تحفظ کے پیشِ نظر رواں برس اگست میں ایران کے ساتھ تمام مالی اور اقتصادی لین دین بھی معطل کر دیا تھا۔