ایرانی ردعمل فوری اور تکلیف دہ ہوگا: باقر قالیباف کا امریکا کو تنبیہ

تہران: ایرانی پارلیمنٹ کے اسپیکر محمد باقر قالیباف نے امریکہ کو سخت لہجے میں خبردار کرتے ہوئے کہا ہے کہ ایرانی سلامتی اور قومی مفادات کے خلاف کسی بھی امریکی اقدام کا جواب فوری، شدید اور انتہائی تکلیف دہ ہو گا۔

ایرانی ذرائع ابلاغ کے مطابق پارلیمنٹ سے خطاب اور ذرائع ابلاغ کو دیے گئے بیان میں باقر قالیباف نے واضح کیا کہ ایران کی جانب سے نپے تلے اور محدود ردِعمل کا دور اب یکسر ختم ہو چکا ہے۔ انہوں نے کہا کہ واشنگٹن اور اس کے اتحادیاں یہ بات اچھی طرح سمجھ لیں کہ ایرانی قوم کی سلامتی اور اقتصادی و دفاعی مفادات کو نقصان پہنچانے کی صورت میں انہیں بھاری قیمت چکانا پڑے گی۔

اسپیکر ایرانی پارلیمنٹ نے مزید کہا کہ پاسدارانِ انقلاب اور ایرانی مسلح افواج کسی بھی جارحیت یا اشتعال انگیزی کا مساوی اور مؤثر جواب دینے کے لیے مکمل طور پر تیار ہیں۔ انہوں نے زور دیا کہ ایران کی سرزمین، بحری حدود یا فضائی حدود کو نشانہ بنانے والے کسی بھی عمل کا فوری اور دندان شکن جواب دیا جائے گا۔