بھارتی عدالتوں سے انصاف کی توقع نہیں، کشمیر کیلئے سزائے موت بھی قبول ہے: یاسین ملک

حریت رہنما یاسین ملک نے بھارتی عدالتی نظام پر عدم اعتماد کا اظہار کرتے ہوئے سری نگر کی عدالت میں 25 صفحات پر مشتمل تفصیلی حلف نامہ جمع کرا دیا ہے، جس میں انہوں نے اپنا مقدمہ مزید لڑنے سے صاف انکار کر دیا ہے۔ یاسین ملک کا کہنا ہے کہ وہ اپنا معاملہ اللہ تعالیٰ کے سپرد کرتے ہیں، کیونکہ بھارتی حکومت 36 سال بعد ایک من گھڑت اور جھوٹے مقدمے میں ملوث کر کے انہیں سزائے موت دینے کا منصوبہ بنا چکی ہے۔ اپنے حلف نامے میں انہوں نے 1990ء کے سرلا بھٹ قتل کیس میں ملوث ہونے کے الزامات کی سخت تردید کی اور واضح کیا کہ واقعے سے 11 روز قبل شدید زخمی ہونے کے باعث ان کے لیے کسی قسم کی منصوبہ بندی یا ہدایت دینا ممکن ہی نہیں تھا۔ یاسین ملک نے مؤقف اپنایا کہ سیاسی انتقام اور عدالتی ناانصافی کے خلاف احتجاج کے طور پر انہوں نے مقدمہ نہ لڑنے کا فیصلہ کیا ہے، اور عدالتی سزا قبول کرنے کا مقصد ہرگز اپنے اوپر لگائے گئے جھوٹے الزامات کو تسلیم کرنا نہیں ہے۔