امریکی صدر کا آبنائے ہرمز سے تمام سمندری بارودی سرنگیں ہٹانے کا دعویٰ

واشنگٹن: امریکی صدر ڈونلڈ ٹرمپ نے دعویٰ کیا ہے کہ امریکی بحریہ نے حکمتِ عملی کے تحت آبنائے ہرمز میں بچھائی گئی تمام سمندری بارودی سرنگوں (Naval Mines) کو مکمل طور پر صاف کر دیا ہے۔

سوشل میڈیا اور میڈیا سے گفتگو میں امریکی صدر نے بتایا کہ امریکی بحریہ نے انہیں باقاعدہ مطلع کیا ہے کہ آبنائے ہرمز کا بحری راستہ اب محفوظ ہے۔ تاہم انہوں نے ایران کو سخت ترین انتباہ جاری کرتے ہوئے کہا کہ اگر کسی بھی جہاز یا کشتی نے دوبارہ نئی بارودی سرنگیں بچھانے کی کوشش کی تو اسے فوری طور پر نشانہ بنا کر تباہ کر دیا جائے گا۔

ڈونلڈ ٹرمپ کا کہنا تھا کہ امریکی خلائی فوج (US Space Force) کے ذریعے آبنائے ہرمز کے ایک ایک حصے اور ساحلی خطے پر کڑی نظر رکھی جا رہی ہے۔ انہوں نے مزید کہا کہ ایران کی ان جوہری تنصیبات کی بھی نگرانی کی جا رہی ہے جنہیں پہلے ہی نشانہ بنایا جا چکا ہے۔

امریکی صدر نے واضح کیا کہ بارودی سرنگیں بچھانے یا بحری راستوں کو بند کرنے کی کسی بھی کوشش کے معاملے میں “زیرو ٹالرنس” (Zero Tolerance) پالیسی نافذ العمل ہے اور اس پر سختی سے عملدرآمد کیا جائے گا۔