مہنگی منگوائی گئی چینی سستی برآمدکرنےکی اجازت، قومی خزانے کو اربوں روپے کا نقصان

وفاقی وزارتِ پیداوار نے مہنگے داموں درآمد کی گئی چینی کو سستے نرخوں پر برآمد کرنے کی اجازت دے دی ہے، جس سے قومی خزانے کو اربوں روپے کے شدید مالی نقصان کا سامنا کرنا پڑے گا۔ ذرائع کے مطابق انتظامیہ مقامی سطح پر موجود ڈھائی لاکھ ٹن سستی چینی کو برآمد کرنے کا وقت پر فیصلہ نہ کر سکی اور اس کے برعکس صرف ایک لاکھ ٹن چینی برآمد کرنے کی منظوری دی گئی، جسے متعلقہ حلقوں نے انتہائی مایوس کن قرار دیا ہے۔ شوگر ملز مالکان نے وزارتِ پیداوار کو پیشگی مطلع کر دیا ہے کہ اس پالیسی کے باعث اب کسانوں سے گنے کی نئی فصل کی خریداری شدید مشکلات کا شکار ہو جائے گی۔