امریکہ میں کیلبری فونٹ ختم، ٹائمز نیو رومن فونٹ کی بحالی کا حکم

واشنگٹن: امریکی وزیر خارجہ مارکو روبیو نے سفارتکاروں کو ہدایت دی ہے کہ وہ سرکاری دستاویزات میں دوبارہ ٹائمز نیو رومن فونٹ استعمال کریں، جب کہ بائیڈن دور میں اپنایا گیا کیلِبری فونٹ فوری طور پر واپس لے لیا گیا ہے۔

روبیو نے سابق وزیر خارجہ انٹونی بلنکن کے فیصلے کو “غیر ضروری اور فضول پالیسی اقدام” قرار دیتے ہوئے کہا کہ ٹائمز نیو رومن زیادہ باضابطہ اور پیشہ ورانہ فونٹ ہے۔ نیا حکم نامہ 10 دسمبر سے نافذ ہوگا اور داخلی و خارجی دونوں دستاویزات پر لاگو ہوگا۔

کیلِبری کے ڈچ ڈیزائنر لوکاس ڈی گروٹ نے اسے ’’اداس کن اور مضحکہ خیز‘‘ قرار دیتے ہوئے کہا کہ کیلِبری جدید اسکرینوں پر آسانی سے پڑھنے کے لیے تیار کیا گیا تھا۔

امریکی محکمہ خارجہ کے ترجمان نے بتایا کہ ٹائمز نیو رومن پر واپسی صدر ڈونلڈ ٹرمپ کی اس پالیسی کا حصہ ہے جس کا مقصد سرکاری مواصلات کو یکساں اور زیادہ رسمی بنانا ہے۔

ریاستی اداروں میں عموماً سیرِف فونٹس (جیسے ٹائمز نیو رومن) کو زیادہ باضابطہ سمجھا جاتا ہے، جب کہ کیلِبری جیسا سنس سیرِف فونٹ اسکرین پر پڑھنے کے لیے آسان تصور کیا جاتا ہے، خصوصاً ان افراد کے لیے جنہیں پڑھنے میں مشکلات ہوتی ہیں۔