ٹرمپ کا ایران کے خلاف تاریخ کی سب سے سخت اقتصادی کارروائی کا اعلان

امریکی صدر ڈونلڈ ٹرمپ نے ایران کے خلاف تاریخ کی سب سے سخت اور تباہ کن اقتصادی کارروائی کا باضابطہ اعلان کر دیا ہے، جس کو انہوں نے “اقتصادی ڈی ڈے” (Economic D-Day) کا نام دیا ہے۔

سوشل میڈیا پلیٹ فارم ‘ٹروتھ سوشل’ پر جاری اپنے ایک بیان میں امریکی صدر نے واضح کیا کہ ایران کو مالی، تجارتی یا دیگر سہولیات فراہم کرنے والے کسی بھی ملک یا ادارے کو بھی شدید معاشی نتائج اور امریکی پابندیوں کا سامنا کرنا پڑے گا۔ ٹرمپ کا کہنا تھا کہ ایران کے پاس ان کے ساتھ معاشی و سفارتی معاہدے کا سنہری موقع موجود تھا لیکن اس نے اسے ضائع کر دیا۔ امریکہ اب غیر معمولی پیمانے پر معاشی جنگ کے ذریعے ایران کو عالمی سطح پر مکمل طور پر تنہا کرنے کا آغاز کر رہا ہے۔

امریکی صدر نے دعویٰ کیا کہ ایران کی بحریہ اور فضائیہ کو شدید نقصان پہنچ چکا ہے، اس کی ملٹری فیکٹریاں ملبے کا ڈھیر بن چکی ہیں اور کرنسی بے وقعت ہو چکی ہے۔ انہوں نے امریکی اتحادیوں اور عالمی برادری پر زور دیا کہ وہ تیل کی اسمگلنگ، نقد رقم کی منتقلی، ایکسچینج ہاؤسز، بحری جہازوں کی رجسٹریشن اور فرنٹ کمپنیوں کو فوری روکیں۔ انہوں نے مزید کہا کہ اس اقدام کا بنیادی مقصد ایران کو جوہری ہتھیار حاصل کرنے اور دہشت گردی کی مبینہ معاونت سے روکنا ہے۔